“ახალგაზრდა მეცნიერების მიერ შექმნილი მაღალტექნოლოგიური საწარმოები გადასახადებისგან 3 წლით უნდა გათავისუფლდნენ” – ფრიდონ ინჯიას ახალი ინიციატივა
ახალგაზრდა ქართველი მეცნიერებისა და ინტელექტუალური კაპიტალის საქართველოში დამაგრების მიზნით, „ევროპელი სოციალისტების“ თავმჯდომარე ფრიდონ ინჯია პარლამენტის პლენარულ სხდომაზე ახალი ინიციტივით გამოვიდა.
„ახალგაზრდა მეცნიერების მიერ შექმნილ თანამედროვე ტექნოლოგიებზე დაფუძნებული საწარმოები სახელმწიფომ 3 წლის განმავლობაში უნდა გაათავისუფლოს გადასახადებისგან. ეს მოგვცემს იმას, რომ განათლებული ახალგაზრდები არ წავლენ საზღვარგარეთ და აქ შექმნიან საწარმოებს, საქართველოდან არ მოხდება ინტელექტუალური კაპიტალის გადინება“. – განაცხადა ფრიდონ ინჯიამ.
მისი თქმით, ახალგაზრდების მიერ შექმნილი მაღალი ტექნოლოგიები და მათი გამოყენებით ჩამოყალიბებული საწარმოები მრავალ სფეროში შეიძლება დაინერგოს, როგორც მზის ბატარეების ფართოდ გამოყენების, ისე სოფლის მეურნეობისა და მრეწველობის მიმართულებებით.
„ამით შევაჩერებთ ახალგაზრდების გადინებას. მათ მიერ შექმნილ პროექტებს თუ მხარს დაუჭერს და დააკმაყოფილებს ეკონომიკის სამინისტრო, ეს ხელს შეუწყობს საქართველოში უცხოური ინვესტიციების მოზიდვასაც“. – განაცხადა „ევროპელი სოციალისტების“ თავმჯდომარემ ფრიდონ ინჯიამ.