ყოველთვიური არქივები: ივლისი2022

საქართველოს პარლამენტის ვიცე სპიკერმა ავთანდილ ენუქიძემ ქვეყნის უმაღლეს საკანონმდებლო ორგანოში ყინულის ჰოკეის საერთაშორისო ფედერაციის პრეზიდენტთან ლუკ ტარდიფთან და საქართველოს ყინულის ჰოკეის ეროვნული ფედერაციის პრეზიდენტთან ზაქარია ხეჩუაშვილთან გამართა შეხვედრა.

13 ივლისს საქართველოში ყინულის ჰოკეის საერთაშორისო ფედერაციის პრეზიდენტის ლუკ ტარდიფის ვიზიტის ფარგლებში საქართველოს კულტურის, სპორტისა და ახალგაზრდობის სამინისტროსა და ყინულის ჰოკეის საერთაშორისო ფედერაციას შორის თანამშრომლობის მემორანდუმი გაფორმდა, რაც საქართველოში ყინულის მოედნის მშენებლობას ითვალისწინებს.

მემორანდუმს ხელი საქართველოს კულტურის, სპორტისა და ახალგაზრდობის მინისტრმა, თეა წულუკიანმა და ყინულის ჰოკეის საერთაშორისო ფედერაციის პრეზიდენტმა, ლუკ ტარდიფმა მოაწერეს.

საქართველოს პარლამენტის ვიცე-სპიკერმა ავთანდილ ენუქიძემ, როგორც საქართველოს ყინულის ჰოკეის ეროვნული ფედერაციის ვიცე-პრეზიდენტმა, ყინულის ჰოკეის საერთაშორისო ფედერაციის პრეზიდენტს ლუკ ტარდიფს მადლობა გადაუხადა სტუმრობისთვის და იმ მხარდაჭერისთვის, რომელიც მან საქართველოს მიმართ სპორტის ამ კონკრეტული სახეობის განვითარების კუთხით გამოიჩინა.

„ჰოკეის საერთაშორისო ფედერაციის პრეზიდენტის აქტიურობა შეფასებულია ძალიან მაღალ დონეზე, იმიტომ, რომ ჩვენ არ ვართ ის ქვეყანა, სადაც ეს სპორტი ძალიან არის განვითარებული. ამიტომ მისი ყურადღება არის ძალიან დიდი პატივი ჩვენთვის და დიდი მადლობა ამისთვის. როგორც პარლამენტის თავმჯდომარის მოადგილე, როგორც ქართველი და როგორც ჰოკეის ფედერაციის ვიცე-პრეზიდენტი დიდ მადლობას ვუხდი ლუკ ტარდიფს ყველაფრისთვის“, – განაცხადა შეხვედრაზე ავთანდილ ენუქიძემ.

„რაც შეეხება საქართველოს კულტურის, სპორტისა და ახალგაზრდობის მინისტრის თეა წულუკიანის განცხადებას იმის შესახებ, რომ საქართველოში ყინულის ჰოკეის განვითარება არის ძალიან მნიშვნელოვანი, იგი ასევე, გახლავთ საქართველოს ვიცე-პრემიერი და მას ამ განცხადების გაკეთების მანდატი ჰქონდა ქვეყნის პრემიერ-მინისტრის მხრიდან. საქართველოში ყველა სახის სპორტის განვითარებას დღეს ძალიან დიდი ყურადღება ექცევა. მე პირადად მქონდა პრემიერთან საუბარი, და ფაქტიურად გადაწყვეტილია ის, რომ ჩვენს ქვეყანაში აშენდეს ყინულის ჰოკეის მოედნები და ამ ყველაფერზე თქვენ მუშა პროცესში შეძლებთ იყოთ საქმის კურსში. მით უმეტეს, თქვენ აქეთ შემოგვთავაზეთ გვერდში დგომა და კიდევ ერთხელ დიდ მადლობას გიხდით ამისთვის“,- აღნიშნა ავთანდილ ენუქიძემ.

თავის მხრივ, ყინულის ჰოკეის საერთაშორისო ფედერაციის პრეზიდენტმა ლუკ ტარდიფმა შეხვედრაზე აღნიშნა, რომ საქართველოში 10 წლის წინ იყო ჩამოსული იმისთვის, რომ გადადგმულიყო პირველი ნაბიჯები, და საქართველოს მსოფლიო ჩემპიონატზე დაეწყო თამაში.

„10 წლის შემდეგ ძალიან დიდი წინსვლა და ცვლილებები დავინახე, რაც ძალიან მიხარია. ამ 10 წლის განმავლობაში სისტემური ცვლილებებია განხორციელებული, შექმნილია სპორტის ამ სახეობის სისტემა, რაც მანამდე არ არსებობდა“, -განაცხადა შეხვედრაზე ლუკ ტარდიფმა.

ლუკ ტარდიფის თქმით, ის ხედავს, რომ ქართველებში არის ხასიათი, რომელიც ძალისმიერი და გუნდური სპორტის სახეობებისთვისაა საჭირო და მიაჩნია, რომ საქართველო ჰოკეიშიც იქნება ისეთივე წარმატებული, როგორიც რაგბში ან კალათბურთშია.

„მოხარული ვარ, რომ ჰოკეის ყინულის მოედანი აშენდება საქართველოში. ახლა საქართველოსთვის საჭიროა მეორე ეტაპის დაწყება ჰოკეის განვითარების კუთხით. უნდა დაიწყოს ახალი თაობის გაზრდა და ამისთვის ინფრასტრუქტურის შექმნაა საჭირო. მე ვისურვებდი გარკვეული წლების შემდეგ საქართველომ ტოპ-დივიზიონში ითამაშოს. გაჩნდება ახალგაზრდული გუნდები, ქალთა გუნდები… მიმაჩნია, რომ საქართველოს მთავრობას ძალიან კარგი კონცეფცია აქვს, კერძოდ სპორტის ბევრი სახეობის სასახლეები თავმოყრილი იქნება ერთ ტერიტორიაზე, მათ შორის ყინულის მოედანიც. ის პროექტები, რაც მოვისმინე ბათუმში, თბილისში, ბაკურიანში ეს იქნება მეორე ეტაპისთვის ნახტომის დასაწყისი, რომელის საქართველოს სჭირდება, და მე ყველანაირად ხელს შეგიწყობთ ამ ყველაფრის განხორციელებაში“, – განაცხადა საერთაშორისო ფედერაციის პრეზიდენტმა.

მისი თქმით, სავსებით რეალისტურია 2-3 წელიწადში, როდესაც დასრულდება ინფრასტრუქტურის მშენებლობა, საქართველოში ჩატარდეს მსოფლიო ჩემპიონატი ყინულის ჰოკეიში, რადგან საქართველოს მსოფლიო დონის ჩემპიონატების გამართვის კარგი გამოცდილება აქვს.

📌 საპარლამენტო პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ საქართველოს პარლამენტის თავმჯდომარის, შალვა პაპუაშვილის ხელმძღვანელობით, პარლამენტში სასამართლო რეფორმის სამუშაო ჯგუფის პირველი შეხვედრაში მიიღო მონაწილეობა.

🔹️ სასამართლო რეფორმის სამუშაო ჯგუფის შეხვედრა პერიოდულად გაიმართება და იგი ევროკომისიის 12-პუნქტიანი რეკომენდაციების შესრულების ფარგლებში, მმართველი პარტიის მიერ ინიცირებული პროცესის ერთ-ერთი ნაწილია.

🔹️„ევროპელი სოციალისტების“ თავმჯდომარემ შეხვედრაზე კიდევ ერთხელ დააფიქსირა თავისი პოზიცია იმის შესახებ, თუ რატომ ვერ მიიღო საქართველომ ევროკავშირის წევრობის კანდიდატის სტატუსი.

როგორც ფრიდონ ინჯიამ აღნიშნა, „ეს არის პოლიტიკური გადაწყვეტილება, რომელიც მიღებული იქნა ევროპასა თუ ამერიკაში, უფრო მეტად ამერიკაში, იმიტომ, რომ ამერიკა მეორე ძალას აფინანსებს 88 მილიონი აშშ დოლარით და ძირითადი მმართველი ძალა არის დაჩაგრული.“

🔹️ „რაც შეეხება თავად ამ 12 პუნქტს… თუნდაც, რომ შევასრულოთ, თქვენ თუ იმის იმედი გაქვთ, რომ შევასრულებთ, ჯერ ერთი – ეს შეუსრულებადია, და ჩვენ მოგვცემენ რაღაც არარსებულ, მოგონილ სტატუსს, ამის იმედი ნუ გექნებათ, არც მე ვარ ამ იმედით მოსული. მე მივიღებ მონაწილეობას სამუშაო ჯგუფის მუშაობაში, იმიტომ, რომ ეს ჩემს მოვალეობაში შედის, როგორც ხალხის მიერ არჩეული დეპუტატისა, მე მონაწილეობა უნდა მივიღო ყველა კანონის განხილვაში,“ – განაცხადა შეხვედრაზე ფრიდონ ინჯიამ.

🔹️ პოლიტიკური ჯგუფის თავმჯდომარის აზრით, ევროკავშირის მიერ წარმოდგენილი რეკომენდაციიდან „დეპოლარიზაციის პუნქტი გამოგონილია სწორედ საქართველოსთვის“. დეპუტატს მიაჩნია, რომ ამ პროცესში უდიდეს როლს ასრულებენ საქართველოს ის არასამთავრობო ორგანიზაციები, რომლებიც 88 მილიონი დოლარით ფინანსდებიან და რეალურად პოლიტიკური პარტიების ფუნქციას ასრულებენ.

🔹️ „დეპოლარიზაციის პუნქტი ვფიქრობ, რომ ეს საქართველოსთვის არის მოგონილი, იმიტომ, რომ ყველა სახელმწიფოშია პოზიცია-ოპოზიცია, მაგრამ ასეთ დონეზე არ გამოუტანია არავის ეს საკითხი. ის 88 მლნ. არ მისცეთ იმ ხალხს, ვინც აქ იდგა და ებრძოდა მმართველ პარტიას და ხელისუფლებას, ან იგივე თანხა მიეცით სხვა პოლიტიკურ ძალებსაც და პოლარიზაცია ავტომატურად აღმოიფხვრება. ისინი არასამთავრობოები კი არ არიან, ისინი არიან პოლიტიკური პარტიები. შეუწყვიტონ დაფინანსება და თუ შეუწყვეტენ დაფინანსებას, აღარ იქნება პოლარიზაცია, ან მმართველმა პარტიამ გადასცეს ხელისუფლება „განთქმულ“ „სირცხვილიას“ და არ იქნება პოლარიზაცია“, – აღნიშნა ფრიდონ ინჯიამ.

🔹️ „ევროპელი სოციალისტების“ პოლიტიკური ჯგუფის თავმჯდომარის განცხადებით, თავის მოტყუება იქნება ის, რომ ევროკავშირის 12 პუნქტიანი რეკომენდაციის შესრულებით საქართველო მიიღებს კანდიდატის სტატუსს, რადგან ეს ყველასთვის ნათელია, რომ პოლიტიკური გადაწყვეტილებაა. ამიტომ, უმჯობესია ხელისუფლებამ ქვეყნის ინტერსებიდან გამომდინარე იმოქმედოს, მით უფრო, როცა საქართველო ევროკავშირის ასოცირების წევრი ქვეყანაა და ამ ხელშეკრულებაში ყველაფერია გაწერილი, რაც სახელმწიფომ უნდა გააკეთოს.

„თავს ნუ მოვიტყუებთ, რომ ამის შესრულებით მოგვანიჭებენ არაფრის მომცემ სტატუსს. ჩვენ გავაგრძელოთ ჩვენი საქმე, ასოცირების ხელშეკრულებაში ყველაფერია გაწერილი, რაც უნდა გავაკეთოთ“,- დასძინა ფრიდონ ინჯიამ.

🔹️ რაც შეეხება სასამართლო რეფორმას, პოლიტიკური ჯგუფის თავმჯდომარის თქმით, ამ საკითხთან მიმართებაში „უნდა არსებობდეს სტრატეგია, როგორი უნდა იყოს სასამართლო, ხოლო ტაქტიკა კი არის – საჭირო კანონების მიღება“.

„სასამართლო რეფორმის განხორციელების პროცესში უნდა იყოს ჩადებული და გათვალისწინებული მექანიზმები, რომელიც გამორიცხავს ისეთი ადამიანების დანიშვნას სასამართლო სისტემაში, რომლებიც არ იმსახურებენ თავისი ერუდიციით, გამოცდილებით და სხვა თვისებებით ამ პოზიციაზე ყოფნას. მთავარია, რომ იქ მოსამართლე იყოს უმაღლესი დონის. ასევე, მეორე მნიშვნელოვანი ფაქტორია, სასამართლო პროცესების გაჭიანურება, რომელიც უნდა აღმოიფხვრას. სასამართლო პროცესები არ უნდა ჭიანურდებოდეს, არც საკონსტიტუციო და არც სხვა ინსტანციის სასამართლოში“,- განაცხადა ფრიდონ ინჯიამ.