分类档案： 消息

🔺 საპარლამენტო პოლიტიკური ჯგუფის და პოლიტიკური პარტია „ევროპელი სოციალისტების“ შეხვედრა ევროპარლამენტის წევრებთან კლერ დეილთან (Clare DALY) და მიკ ვოლასთან (Mick WALLACE).

🔴ქვეყანაში მიმდინარე მნიშვნელოვანი პოლიტიკური და ეკონომიკური საკითხები განიხილეს უმაღლეს საკანონმდებლო ორგანოში გამართულ 29 მაისის შეხვედრაზე, რომელიც საპარლამენტო პოლიტიკურ ჯგუფს „ევროპელ სოციალისტებსა“ და ევროპარლამენტარ კლერ დეილთან (Clare DALY) და მიკ ვოლასთან (Mick WALLACE) ერთად გაიმართა.

🔴პოლიტიკური ჯგუფის თავმჯდომარემ ფრიდონ ინჯიამ შეხვედრაზე ყურადღება გაამახვილა ევროკავშირის 12 რეკომენდაციასთან დაკავშირებით და აღნიშნა, რომ იგი მოგონილია „ქართული ოცნების“ ხელისუფლების შესაცვლელად და მთლიანობაში დასავლეთის ყველა ქმედება საქართველოსთან მიმართებაში არის სისტემის ნაწილი, რომლის მიზანია ქვეყანაში ჰყავდეთ მართვადი ხელისუფლება.

🔴 ამასთან დეპუტატმა ხაზგასმით აღნიშნა, რომ საქართველოს ხელისუფლებას თავისი მმართველობის გარკვეულ მნიშვნელოვან ნაწილში აქვს შეცდომები და ამასთან დაკავშირებით იგი როგორც პოლიტიკური ჯგუფის თავმჯდომარე ძალიან ხშირად საუბრობს საპარლამენტო ტრიბუნიდან ამ პრობლემების შესახებ. უფრო მეტიც, იგი ხელისუფლებას ყოველთვის სთავაზობს ამ პრობლემების გადაჭრის გზებს არგუმენტირებულად.
„არსებობს მთელი რიგი საკითხები, სადაც ხელისუფლებას მართებს მეტი ძალისხმევა და პოლიტიკური თუ ეკონომიკური ვითარების მაქსიმალურად გააზრება, რადგან სწორედ ხელისუფლება არის პასუხისმგებელი ქვეყნის მოსახლეობის წინაშე. მან ყველაფერი უნდა გააკეთოს პირველ რიგში მშვიდობის, სტაბილურობის შესანარჩუნებლად და ქვეყნის ეკონომიკური განვითარებისთვის. საქართველომ უნდა დაიბრუნოს თავისი ღირსეული ადგილი ამიერ კავკასიის რეგიონში, ის ადგილი, რომელიც მას ისტორიულად ყოველთვის ეკავა“, – აღნიშნა ფრიდონ ინჯიამ.

🔴 დეპუტატს ერთ-ერთ მთავარ საკითხად მიაჩნია კანონის უზენაესობა და სამართლის აღსრულება განურჩევლად პირის ნებისმიერი მაღალი პოლიტიკური თანამდებობისა.
„მხოლოდ სამართლიანობის განცდა და კანონის უზენაესობა მისცემს საზოგადოებას ქვეყნის წინაშე არსებული ნებისმიერი პრობლემის დაძლევის სტიმულს, რაც სახელმწიფოს წინსვლისა და განვითარების საწინდარი გახდება“, – აღნიშნა მან.

🔴 პოლიტიკური ჯგუფის თავმჯდომარემ ყურადღება გაამახვილა ევროკავშირის კანდიდატის სტატუსთან დაკავშირებით ქვეყანაში დღეს არსებულ პოლიტიკურ ვითარებასთან დაკავშირებით და განაცხადა, რომ ქვეყანა პრაქტიკულად, ყოველდღიურ რეჟიმში განიცდის უმძიმეს ზეწოლას დასავლეთისა და ქვეყნაში არსებული შიდა დესტრუქციული და რადიკალური ძალების მხრიდან, რაც მიმართულია ქვეყნის სახელმწიფოებრიობის, სუვერენიტეტის, დამოუკიდებლობის წინააღმდეგ.

🔴 „ამ ვითარების გათვალისწინებით, უმნიშვნელოვანესია თქვენი ხმა და პოლიტიკური განცხადებები ევროპარლამენტის მაღალი ტრიბუნიდან ქართული სახელმწიფოებრიობისა და ქვეყნის მოსახლეობის ინტერესების დასაცავად“, – განაცხადა ფრიდონ ინჯიამ.

🔴 პოლიტიკური ჯგუფის თავმჯდომარეს მიაჩნია, რომ პრეზიდენტ ზურაბიშვილის ვიზიტი ბრიუსელში და მისი გამოსვლა ევროპარლამენტში უნდა ემსახურებოდეს სიმართლეს და ქვეყნის ინტერსებს, ხოლო იმ შემთხვევაში, თუ საქართველოს პრეზიდენტის მხრიდან გაჟღერებული იქნება უსამართლო და ცილისმწამებლური გზავნილები, ასეთ შემთხვევაში მისი გამოსვლა უყურადღებოდ არ უნდა დარჩეს და მას საკადრისი პასუხი უნდა გაეცეს თავად ევროპარლამენტარების მხრიდან, რომლებიც საქართველოში მიმდინარე მოვლენებზე სრულ და რეალისტურ სურათს ფლობენ.

🔴 თავის მხრივ, ევროპარლამენტარებმა კლერ დეილიმ (Clare DALY) და მიკ ვოლასმა (Mick WALLACE) განაცხადეს, რომ ისინი იზიარებენ საპარლამენტო პოლიტკური ჯგუფისა და პოლიტიკური პარტიის „ევროპელი სოციალისტების“ თავმჯდომარის ფრიდონ ინჯიას და მისი წევრების ხედვებს ქვეყანაში მიმდინარე აქტუალურ პოლიტიკურ საკითხებთან დაკავშირებით.

🔴 ასევე მათ მიაჩნიათ, რომ საქართველო ნამდვილად იმსახურებდა ევროკავშირის კანდიდატის სტატუსის მინიჭებას.

🔴 „რა თქმა უნდა, მშვიდობას ალტერნატივა არ აქვს. ომში იხოცებიან ადამიანები და მდიდრდებიან იარაღის მწარმოებელი მსხვილი კორპორაციები. აქედან გამომდინარე, ჩვენ არ ვთვლით, რომ თქვენ პრორუსული პოზიცია გაქვთ, არამედ მიგვაჩნია, რომ თქვენ გამოხატავთ ხალხის აზრს, და ეს აბსოლუტურად მართალია“, – განაცხადა მიკ ვოლასმა.

🔴 მისივე თქმით, დასავლეთი საქართველოს გეოპოლიტიკურ მდებარეობას ყოველთვის გამოიყენებს პოლიტიკური და ეკონომიკური ზეწოლისთვის თავისი ინტერსებიდან გამომდინარე.

🔴 კლერ დეილის განცხადებით, ევროკავშირს ამერიკის შეერთებულ შტატებთან ერთად მართლაც აქვს თავისი ინტერესები საქართველოსთან მიმართებაში და მისთვის ნამდვილად არ არის მისაღები ქვეყნის დღევანდელი ხელისუფლების ის თამამი ნაბიჯები, რომელიც საქართველოს მოსახლეობის უპირველეს ინტერესებს ემსახურება.

🔴 შეხვედრაზე საკუთარი პოზიციები დააფიქსირეს პარლამენტის ვიცე-სპიკერმა, პოლიტიკური ჯგუფის წევრმა, ავთანდილ ენუქიძემ და პოლიტიკური ჯგუფის წევრმა, საგარეო ურთიერთობათა კომიტეტის თავმჯდომარის მოადგილემ დავით ზილფიმიანმა. მათ მხარი დაუჭირეს ევროპარლამენტარების იმ ძირითად პათოსს, პრინციპებსა და მოსაზრებებს, რომელსაც ისინი აჟღერებენ ევროპარლამენტის მაღალი ტრიბუნიდან საქართველოსთან მიმართებაში.

🔴 შეხვედრას ასევე, ესწრებოდნენ საქართველოს „სოციალისტური პლატფორმის“ წარმომადგენლები თემურ ფიფია და ილია ლობჟანიძე.
თემურ ფიფიამ ხაზი გაუსვა სოციალისტური იდეოლოგიის ძირითადი პრინციპების თანხვედრას და იმედი გამოთქვა სამომავლო ნაყოფიერ თანამშრომლობასთან დაკავშირებით.

🔴 შეხვედრაზე ორ პოლიტიკურ ძალას შორის მოხდა შეთანხმება ერთობლივი თანამშრომლობის მემორანდუმის გაფორმების შესახებ, რომელსაც უახლოეს დღეებში ხელი მოეწერება.

❗️ გ ა ნ ც ხ ა დ ე ბ ა

✅პარტია „ევროპელი სოციალისტების“ განცხადება
დღეს, ჩვენი ქვეყნის, სახელმწიფოებრიობისა და სუვერენიტეტის წინააღმდეგ აგორებულია სიცრუის ზღვა ტალღა, რასთან დაკავშირებითაც ჩვენ საპარლამენტო პოლიტიკური ჯგუფი და პოლიტიკური პარტია „ევროპელი სოციალისტები“ საკმაოდ აქტიურად ვმუშაობთ ევროპის სხვადასხვა სტრუქტურებში, განსაკუთრებით ევროპარლამენტში, რათა მაქსიმალურად იქნას განეიტრალებული ის ცილისწამება და ქვეყნის მიმართ მოღალატეობრივი ქმედებები, რომელიც მხოლოდ ვიწრო პოლიტიკური ინტერსებიდან გამომდინარეობს.

✅უნდა აღინიშნოს, რომ ჩვენ გვაქვს ძალიან საქმიანი და პარტნიორული ურთიერთობები ჩვენს კოლეგა ევროპარლამენტარებთან, რომლებიც დგანან სოციალური სამართლიანობის, ქვეყნის დამოუკიდებლობისა და იდენტობის პლათფორმაზე. ისინი ქართველი ხალხისა და ქართული სახელმწიფოს გვერდში არიან სამართლიანობისთვის, ქვეყნის ღირსეული მომავლისა და მშვიდობიანი თანაცხოვრებისთვის ბრძოლაში.

✅პოლიტიკურ პარტია „ევროპელ სოციალისტებსა“ და ევროპარლამენტის პოლიტიკურ ჯგუფს შორის არსებობს თანამშრომლობისა და პოლიტიკური პარტნიორობის ურთიერთგაგების მემორანდუმი, რომელიც დაფუძნებულია ქართული სახელმწიფოს ძირითად ისტორიულ, კულტურულ, ეთნიკურ და ეკონომიკური განვითარების პრინციპებზე.

❗️ საქართველო ევროკავშირში შევა ღირსეულად, ან ღირსეულად არ შევა – ფრიდონ ინჯია

✅ ამის შესახებ საპარლამენტო პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ საქართველოს პარლამენტის პლენარულ სხდომაზე პოლიტიკური დებატებისას განაცხადა.

✅ პოლიტიკური ჯგუფის თავმჯდომარემ თავის გამოსვლაში ყურადღება გაამახვილა ევროკავშირის ელჩების მხრიდან გაკეთებული განცხადებების შესახებ და მათ ბოლოდროინდელ გამოსვლებს დემარში და საქართველოს შიდა საქმეებში უხეში ჩარევა უწოდა.

✅ „როგორ ფიქრობთ, ეს არ არის ქვეყნის საშინაო საქმეებში უხეში ჩარევა? ხომ არ დადგა დრო, მოეკითხოთ მათ როგორც ეს ხდება ისეთ ქვეყნებში, სადაც თავის თავს პატივს სცემენ და მიუთითებენ დიპლომატებს იყვნენ თავის ადგილას და გააკეთონ ის, რაც მათ ევალებთ“, – განაცხადა ფრიდონ ინჯიამ.

✅ დეპუტატმა ასევე, ხაზი გაუსვა საქართველოსთვის ევროკავშირის კანდიდატის სტატუსის მინიჭების საკითხს და აღნიშნა, რომ დღეს, როდესაც ქვეყანას არანაირი სტატუსი არ აქვს მინიჭებული ევროკავშირის მხრიდან არის მცდელობა ქვეყნის დამონების. თუმცა, ფრიდონ ინჯია დარწმუნებულია, რომ საქართველო ამ ზეწოლას ღირსეულად გაუძლებს.

✅„დღეს, როდესაც ჩვენ ჯერ კიდევ არანაირი სტატუსი არ გაქვს, როგორ უნდათ ჩვენი დამონება. წარმოიდგინეთ, თუ სტატუსი მოგვანიჭეს, როგორ გამოიყენებენ ამ სტატუსის მინიჭებას და როგორი ზეწოლა განხორციელდება ჩვენზე. მაგრამ ეს არაფერი. მოგვანიჭონ. ჩვენ ამ ზეწოლას ღირსეულად გავუძლებთ. უფრო ზუსტად – ღირსეულად შევალთ, ან ღირსეულად არ შევალთ“, – განაცხადა ფრიდონ ინჯიამ.

✅ პოლიტიკური ჯგუფის თავმჯდომარეს მიაჩნია რომ ევროკავშირმა თავად უნდა გადაწყვიტოს, თუ როგორი საქართველო სურს მას სამხრეთ კავკასიაში.
ამასთან დეპუტატმა ხაზგასმით აღნიშნა, რომ ევროკავშირისთვის საქართველოს დღევანდელი ხელისუფლება არ არის მისაღები, რაც შესაძლოა გახდეს მიზეზი, რომ ქვეყანას არ მიანიჭონ ევროკავშირის კანდიდატის სტატუსი.

✅ „ევროკავშირმა უნდა გადაწყვიტოს, როგორი საქართველო უნდა მას სამხრეთ კავკასიაში. როგორც იკვეთება, მათ ჩვენი ხელისუფლება ამ სახით აწუხებთ. ამ მიზეზით მათ შეუძლიათ სტატუსი არ მოგვანიჭონ, იმის იმედით, რომ საქართველოში იქნება სამოქალაქო ომი.

✅ ეს უნდა ოპოზიციის ნაწილსაც, რადგანაც მათ მეტი არაფერი დარჩენიათ, რომ თავიანთ საწადელს მიაღწიონ, თუნდაც საქართველოს დანგრევით. მაგრამ იცოდეთ, დაიმახსოვრეთ ჩემი სიტყვა – ეს თქვენი მცდელობა ისევე ხუხულასავით დაგენგრევათ, როგორც სააკაშვილის საქართველოში ჩამოსვლით თქვენი გეგმები დაგენგრათ. იმედია, ამ ყველაფერს გაითვალისწინებს ჩვენი მთავრობა და ღირსეულად დაიცავს საქართველოს ინტერესებს“, – აღნიშნა ფრიდონ ინჯიამ.

✅ პოლიტიკური ჯგუფის თავმჯდომარის განცხადებით, საქართველოს სურვილია იყოს ევროკავშირში, მაგრამ არა ქვეყნის იდენტობისა და სუვერენიტეტის დაკარგვის ხარჯზე.

✅ „ჩვენ გვინდა ევროკავშირში ვიყოთ არა ჩვენი იდენტობისა და სუვერენიტეტის დაკარგვის ხარჯზე. ჩვენ ევროკავშირში საქართველოს მოსახლეობის კეთილდღეობისთვის და ქვეყნის გამთლიანებისთვის გვინდა. ჩვენ არ გვინდა ევროკავშირში იმისთვის, რომ ომში ჩავერთოთ. საქართველო პატარა ქვეყანაა და მის დანგრევას ძალიან ცოტა რამ უნდა. გადავარჩინოთ საქართველო“, – განაცხადა ფრიდონ ინჯიამ.

📍 „დასავლეთის ყველა ქმედება საქართველოსთან მიმართებაში არის სისტემის ნაწილი, რომლის მიზანია ქვეყანაში ჰყავდეთ მართვადი ხელისუფლება. ევროკავშირის კანდიდატის სტატუსი და 12 რეკომენდაცია მოგონილია „ქართული ოცნების“ ხელისუფლების შესაცვლელად“. – ფრიდონ ინჯია.

🔹 ამის შესახებ საპარლამენტო პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ საქართველოს პარლამენტის იურიდიულ საკითხთა კომისიის სხდომაზე განაცხადა, სადაც მეორე მოსმენით „საერთო სასამრთლოების“ შესახებ კანონში ცვლილებები განიხილეს, რომელიც ევროკომისიის 12 რეკომენდაციის ერთერთ ვალდებულებას წარმოადგენს.
ფრიდონ ინჯიამ კომიტეტის სხდომაზე საპარლამენტო უმრავლესობას კიდევ ერთხელ მოუწოდა აიღოს პასუხისმგებლობა ყველა მნიშვნელოვან პროცესზე, რომელიც საკანონმდებლო ხელისუფლების პრეროგატივას წარმოადგენს.

🔹 დეპუტატის განცხადებით, მნიშვნელოვანი იყო საპარლამენტო უმრავლესობის გადაწყვეტილება იუსტიციის უმაღლესი საბჭოს წევრების არჩევის შესახებ. ასევე, დროული გახლდათ ცესკოს თავმჯდომარისა და წევრების არჩევის წესთან დაკავშირებით მიღებული გადაწყვეტილება, თუმცა, ფრიდონ ინჯიას მიაჩნია, რომ იმ ოპოზიციონერ დეპუტატთა ხმები, რომლებმაც მხარი დაუჭირეს ამ ცვლილებას, არ აიღებენ არანაირ პასუხისმგებლობას ამ გადაწყვეტილებასთან მიმართებაში. „

🔹 „პასუხისმგებლობა მაინც იქნება თავიდან ბოლომდე თქვენზე, როგორც მმართველი პოლიტიკური ძალის“. – აღნიშნა დეპუტატმა.

🔹 ფრიდონ ინჯიამ კიდევ ერთხელ გაუსვა ხაზი, რომ ევროკომისიის გადაწყვეტილება საქართველოსთვის კანდიდატის სტატუსზე უარის თქმის შესახებ, იყო მხოლოდ პოლიტიკური გადაწყვეტილება, მიუხედავად იმისა, რომ საქართველო ყველა პარამეტრით წინ უსწრებდა როგორც უკრაინას, ასევე, მოლდოვას.
ამასთან, დეპუტატის აზრით, აბსოლუტურად გაუგებარია თუ რის საფუძველზე შეიმუშავა ევროკომისიამ 12 რეკომენდაცია, მით უფრო, თუ გავითვალისწინებთ, რომ 27 ქვეყნიდან, რომელიც ევროკავშირის წევრია, მსგავსი სახის შესასრულებელი პირობები რეკომენდაციების სახით თავის დროზე არცერთი მათგანისთვის არ წაუყენებიათ.

🔹 პოლიტიკური ჯგუფის თავმჯდომარე მიიჩნევს, რომ სახელმწიფოში გადამწყვეტი როლი ენიჭება კანონის უზენაესობას და ის ათასობით საქმე, რომელიც წლებია თაროზეა შემოდებული, პროკურატურამ უნდა განიხილოს და აღასრულოს კანონი.

🔹 ფრიდონ ინჯიას აზრით, მისთვის მისაღებია უმრავლესობის მიერ შემუშავებული „საერთო სასამრთლოების“ შესახებ კანონი და იგი ამ კანონის მიღებას მხარს დაუჭერს.

🔹 „საერთო სასამართლოების“ შესახებ კანონი უნდა მივიღოთ არა იმისთვის, რომ შევასრულოთ ევროკომისიის 12 რეკომენდაცია, არამედ იმისთვის, რომ კანონი გამოადგეს ქვეყანას და მომავალ თაობებს“.- აღნიშნა ფრიდონ ინჯიამ.

🔹 დეპუტატმა პარალელი გაავლო სააკაშვილის ხელისუფლების პერიოდსა და დღევანდელი ხელისუფლების მმართველობას შორის და აღნიშნა, რომ სააკაშვილის პერიოდში პრაქტიკულად, გამორიცხული იყო კრიტიკული აზრის გამოთქმა, მით უმეტეს, საჯაროდ და ღიად. „ქართული ოცნების“ ხელისუფლებამ კი, ეს მოახერხა და დღეს არის შესაძლებელი საკუთარი აზრი ღიად დააფიქსიროს ყველამ. „მაგრამ ამ ყველაფერს აქვს მეორე მხარე, „ქართული ოცნების“ ხელისუფლებამ უნდა გამოიჩინოს მეტი პრინციპულობა ქვეყნისთვის საკვანძო და მნიშვნელოვან საკითხებთან მიმართებაში“. – დასძინა დეპუტატმა.

🔹 რაც შეეხება ევროკავშირის კანდიდატის სტატუსს, პოლიტიკური ჯგუფის თავმჯდომარემ ხაზგასმით აღნიშნა, რომ ევროკავშირის კანდიდატის სტატუსი მოგონილია „ქართული ოცნების“ ხელისუფლების შესაცვლელად.

🔹 „დასავლეთის ყველა ქმედება საქართველოსთან მიმართებაში არის სიტემის ნაწილი, რომლის მიზანია ქვეყანაში ჰყავდეთ მართვადი ხელისუფლება. ევროკავშირის კანდიდატის სტატუსი და 12 რეკომენდაცია მოგონილი „ქართული ოცნების“ ხელისუფლების შესაცვლელად“. – განაცხადა ფრიდონ ინჯიამ.

ფრიდონ ინჯია – ისეთი კანონპროექტები გვჭირდება, რომლებიც ჩვენი ქვეყნიდან მიგრაციის პროცესს საქართველოს სასარგებლოდ შეცვლის

„უნდა შემუშავდეს ისეთი კანონპროექტები, რომლებიც საქათველოდან მიგრაციის პროცესს ჩვენს სასარგებლოდ შეცვლის, სტიმულს მისცემს ქართულ დიასპორებს დააბანდონ კაპიტალი საქართველოს ეკონომიკის გაძლიერებაში, ასევე სტიმულირებას გაუკეთებენ საქართველოს კერძო სექტორს მათთვის საჭირო კვალიფიციური კადრები ქართული დიასპორებიდან მოიზიდონ“.

ამ საკითხებზე პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ საქართველოს პარლამენტის დიასპორისა და კავკასიის საკითხთა კომიტეტის სხდომაზე ისაუბრა, სადაც განიხილეს და მხარი დაუჭირეს საქართველოს განვითარებისთვის ქართული დიასპორის ჩართულობისა და მდგრადი კაპიტალის მოზიდვის მიზნით თემატური მოკვლევის ჯგუფის შექმნას.

„ამ მოკვლევისგან ველოდებით იმას, რომ კომიტეტს ჰქონდეს დასაბუთებული, გამყარებული საფუძველი ისეთი კანონპროექტების მოსამზადებლად, რომელიც სტიმულს მისცემს უცხოეთში მცხოვრებ ჩვენს თანამემამულეებს ჩამოვიდნენ და იქ დაგროვებული კაპიტალი მოიზიდონ საქართველოში. უნდა შევიმუშაოთ ისეთი კანონპროექტები, რომელიც მიგრაციას ჩვენს სასარგებლოდ შეცვლის. ეს ნიშნავს იმას, რომ ამ კვლევაში უნდა იყოს არგუმენტაცია, ფაქტორები, უნდა იყოს შესწავლილი სხვადასხვა ქვეყნის მაგალითები“, – განაცხადა ფრიდონ ინჯიამ.

ამასთანავე დეპუტატმა ყურადღება გაამახვილა უცხოეთში განათლებამიღებული კადრების საქართველოს კერძო სექტორში დასაქმების შესაძლებლობაზეც.

„თუ იმას მოვახერხებთ, რომ აქ კერძო სექტორში დასაქმდებიან კადრები, რომლებმაც უცხოეთში მიიღეს განათლება, მაშინ შეიძლება ითქვას, რომ ჩვენ ჩვენი სიტყვა ვთქვით. ამ პროცესს უნდა დაეხმაროს საკანონმდებლო ბაზა, რომლიც სტიმულს მისცემს კერძო სექტორს დაასაქმოს და ხელი შეუწყოს ჩვენი თანამემამულეების დაბრუნებას საქართველოში“, – ხაზი გაუსვა ფრიდონ ინჯიამ.

დეპუტატმა კომიტეტის სხდომაზე ასევე დააყენა საკითხი საქართველოდან წასული ემიგრანტებისთვის საქართველოს მოქალაქეობის მიღების პროცედურების გამარტივების აუცილებლობისა და მნიშვნელობის შესახებ.

მისი თქმით, ძალიან ბევრია ისეთი ადამიანი, რომელმაც სხვადასხვა ობიექტური მიზეზის გამო წლების წინ საქართველო დატოვა და ახლა ვერ ახერხებს მოქალაქეობის მიღებას.

ამის მაგალითად ფრიდონ ინჯიამ კომიტეტის წევრებს მოასმენინა მოსკოვში მცხოვრები ერთ-ერთი თანამემამულის ირინა ჯოგლიძის მიერ სოციალურ ქსელში საქართველოს პარლამენტის, პრემიერ-მინისტრის, პრეზიდენტისა და მთავრობის წევრების მისამართით გავრცელებული ვიდეომიმართვა, რომელშიც ემიგრანტი საუბრობს პირადად მისი და მისი აწგარდაცვლილი მეუღლის მიერ წლების განმავლობაში ქართული სახელმწიფოსთვის და რუსეთში არსებული ქართული სათვისტომოსთვის გაწეული ღვაწლის შესახებ. როგორც ემიგრანტი აღნიშნავს, საგამონაკლისო წესით საქართველოს მოქალაქეობის მიღებაზე მას უარი ეთქვა, რაც მას ეჭვს უჩენს მოქალაქეობის საკითხთა კომისიის წევრების ობიექტურობასა და კომპეტენციასთან დაკავშირებით.

პარლამენტის დიასპორისა და კავკასიის საკითხთა კომიტეტის თავმჯდომარემ ბექა ოდიშარიამ საპასუხოდ განაცხადა, რომ პირადად მასთანაც ძალიან ბევრი მსგავსი საქმე შედის, თუმცა არსებობს გარკვეული მიზეზები, რის გამოც კომისიის მიერ ხარვეზდება ესა თუ ის განაცხადი.

კომიტეტის თავმჯდომარე ფრიდონ ინჯიას ამ კონკრეტული შემთხვევის სამუშაო რეჟიმში განხილვას დაჰპირდა.

ამასთანავე ფრიდონ ინჯიამ ყურადღება გაამახვილა რუსეთის ფედერაციაში ქართული დიასპორის წინაშე არსებულ საჭიროებებზეც, რაც, მისი თქმით, დიასპორისა და კავკასიის საკითხთა საპარლამენტო კომიტეტმა წლიური გეგმის თანახმად უნდა განიხილოს.

„ამ დღეებში რუსეთის ფედერაციაში ქართული დიასპორის დღეები იმართება, და ჩვენი სათვისტომო ყოველთვის ძალიან ღირსეულად და მაღალ დონეზე ახერხებს თავის წარმოჩენას. კარგი იქნება, თუ საქართველოში გარკვეულ ღონისძიებებზე მოვიწვევთ იმ ქართველებს.

იყო დრო, როდესაც ბევრს ანკეტაში არ შეჰქონდა თავისი ქართული ეროვნება უხერხულობის გამო… თუმცა დღეს რუსეთის ფედერაციაში შეიცვალა მდგომარეობა, იქიდან გამომდინარე, რომ იქ გამოჩნდა ერთი ადამიანი – დავით ცეცხლაძე, რომელმაც ჩვენი თანამემამულეები იქ გააერთიანა და მათ ხელმძღვანელობს“, – განაცხადა ფრიდონ ინჯიამ.

მისი თქმით, მხოლოდ მოსკოვში შესაძლოა იყოს 400-500 ათასი ჩვენი თანამემამულე.

„რუსეთში 90 რეგიონია. წარმოიდგინეთ, ამ რეგიონებში 1000-დან 10 ათასამდე ჩვენი თანამემამულე ცხოვრობს თავისი ოჯახებით. მხოლოდ დიასპორის კონცერტებზე 2000 კაცი მიდის, მათ ხომ ჰყავთ ოჯახის წევრებიც. იქ მილიონამდე ჩვენი თანამემამულე ცხოვრობს. ბევრი ამბობს მხოლოდ 100 000-მდეო, თუმცა როგორ შეიძლება 100 ათასამდე იყოს, როდესაც მხოლოდ აფხაზეთიდან, კონფლიქტის დროს 200-300 ათასამდე ჩვენი თანამოქალაქე წავიდა იქ“, – განაცხადა დეპუტატმა ინჯიამ.