📍„ნუ გავრბივართ ორთქლმავლის წინ“ – განაცხადა საპარლამენტო პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ პარლამენტის საგარეო ურთიერთობათა კომიტეტის სხდომაზე, სადაც მსჯელობა გაიმართა უკრაინის მოვლენებთან დაკავშირებით საპარლამენტო უმრავლესობის მიერ მომზადებული რეზოლუციის პროექტის შესახებ.
🔷 პოლიტიკური ჯგუფის თავმჯდომარემ მოუწოდა როგორც მმართველ გუნდს, ისე ოპოზიციას განახორციელონ „ბრძნული პოლიტიკა და ნუ გაიქცევიან ორთქლმავლის წინ“.
🔷 „ჩვენი პარტია ცალსახად წინააღმდეგია ყოველგვარი რეზოლუციის. მიუხედავად იმისა, რომ ეს იმდენად გლობალური დაპირისპირებაა, რომ მთელ მსოფლიოს ეხება, ქვეყნების 99%, დაწყებული უკრაინის მეზობლებით, მსგავს რეზოლუციას არ იღებს. მარტო გამოვდივართ ჩვენ. ჩვენ უცბად ვდგებით ერთ მხარეს. მე მეშინია, რომ დაიწყოს ომი და ამ ომში, რომელშიც დასავლეთი მონაწილეობას არ იღებს, ჩვენ აქედან უკვე ვერთვებით.“ – განაცხადა ფრიდონ ინჯიამ.
🔷 მისი თქმით, საქართვლომ თავისი ცალმხრივი პოზიციით, არ უნდა გააღრმავოს დაპირისპირება და არ უნდა იყოს წამქეზებელი ომისკენ, არამედ სიმშვიდისკენ მოუწოდოს მხარეებს, რადგან რუსეთი და უკრაინა, როგორც მოძმე ერები ერთ დღეს, შესაძლოა, კვლავ შერიგდნენ.
🔷 „უნდა დავიკავოთ ისეთი ბრძნული პოზიცია, რა პოზიციაც საქართველომ სომხეთისა და აზერბაიჯანის ომში დაიკავა. ის ბრძნული პოზიცია შეშვენის ჩვენს მრავალსაუკუნოვან ქვეყანას. აქ ჩვენ უცბად ვდგებით ერთ მხარეს. ორი დიდი „მონსტრი“ ომობს… თუ ხედავთ, რომ თვითონ პრეზიდენტი ზელენსკი ამბობს, რომ არ არის ისეთი დაპირისპირება როგორსაც ამბობთ, მაგრამ დასავლეთის გარკვეული ქვეყნები ეუბნებიან, არა, შენ უნდა იომო. დასავლეთმა დღეს უკრაინა გაწირა და შეიძლება ჩვენც მოვხვდეთ ამ ფერხულში. შესაძლოა ისე მოხდეს, რომ თუ მინსკის შეთანხმებას არ შეასრულებს ჩვენი მოძმე უკრაინა, ის ორი ოლქი – დონეცკი და ლუგანსკი რუსეთმა სცნოს, და აღმოჩნდება იმ მდგომარეობაში, როგორშიც საქართველოა. მიმაჩნია, რომ მმართველმა პარტიამ, ხელისუფლებამ უნდა განახორციელოს ისეთი პოლიტიკა, რომელიც საზიანო არ იქნება ჩვენი ქვეყნისთვის, ამ რეზოლუციაში კი არის ისეთი ელემენტები, რითაც ჩვენ, შესაძლოა, ზიანი მივიღოთ. ნუ გავრბივართ ორთქლმავლის წინ.“ – განაცხადა ფრიდონ ინჯიამ.
