საპარლამენტო პოლიტიკური ჯგუფის „ევროპელი სოციალისტების“ თავმჯდომარე ფრიდონ ინჯია მიესალმება საქართველოს მთავრობის ინიციატივას „საქართველოს სისხლის სამართლის კოდექსში ცვლილების შეტანის შესახებ“, რომელიც ითვალისწინებს სისხლისსამართლებრივი პასუხისმგებლობის დაწესებას ისეთი ნაკლებად მძიმე დანაშაულების მომზადებაზე, როგორებიცაა: საქართველოს სახელმწიფო საზღვრის უკანონოდ გადაკვეთა და საქართველოს სახელმწიფო საზღვარზე მიგრანტის უკანონოდ გადაყვანა ან/და მისთვის საქართველოში ყოფნისათვის შესაბამისი პირობების შექმნა (ხელის შეწყობა).
თუმცა, როგორც პოლიტიკური ჯგუფის თავმჯდომარემ იურიდიული კომიტეტის სხდომაზე აღნიშნა, ეს ცვლილებები ადრეც უნდა განხორციელებულიყო და საინტერესოა რამ განაპირობა დღეს ამ ცვლილებების შეტანა სისხლის სამართლის კოდექსში.
„ამ კანონის მიღება მართლაც ძალიან მნიშვნელოვანია და მე მიკვირს აქამდე რატომ არ იყო გათვალისწინებული ეს მუხლი კოდექსში. ჩემი კითხვა მდგომარეობს შემდეგში? – რამ განაპირობა ამ ცვლილებების შეტანა კოდექსში ახლა? იყო რაღაც შემთხვევები, ან უკონტროლო ვითარება, რომელმაც დააჩქარა ამ კანონში ცვლილებების შეტანის აუცილებლობა?“ – განაცხადა ფრიდონ ინჯიამ.
თავის მხრივ, შინაგან საქმეთა მინისტრის მოადგილემ ალექსანდრე დარახველიძემ აღნიშნა, რომ აღნიშნული ცვლილებების შეტანა სისხლის სამართლის კოდექსში განაპირობა ბოლოდროინდელმა პრაქტიკამ და დღეს ქვეყანაში არსებულმა გამოწვევებმა.