„ჯერ მსოფლიოს არც ერთ ქვეყანას უკრაინასთან მიმართებაში რეზოლუცია არ მიუღია“ – განაცხადა საპარლამენტო პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ.
ფრიდონ ინჯია თვლის, რომ თუ საქართველოს უმაღლესი საკანონმდებლო ორგანო მიიღებს რეზოლუციას უკრაინასთან მიმართებაში, ეს უნდა იყოს საქართველოს სასიკეთო რეზოლუცია.
„მე მიმაჩნია, რომ თუ რეზოლუცია გაკეთდება ის უნდა იყოს ჩვენი ქვეყნის სასიკეთო. უფრო მეტიც, რეზოლუციით ჩვენ არ უნდა აღმოვჩნდეთ როგორც მხარე და თუ ჩვენ აღმოვჩნდით როგორც მხარე, რომელიმე სხვა ქვეყნებთან და გინდათ რუსეთთან, ჩვენთან, ჩვენს ტერიტორიაზე შეიძლება გაგრძელდეს 2008 წლის მოვლენები და ეს მოვლენები შეიძლება დაიწყოს უკრაინაშიც. ეს მე არ მსურს. ჩვენ არ გვსურს ომი“ – აღნიშნა ფრიდონ ინჯიამ.
მისი აზრით, ვიღაცისთვის ეს სიტუაცია შეიძლება იყოს სასიკეთო, მაგრამ საქართველოსთვის და ქართველი ხალხისთვის და არც უკრაინისთვის ეს არ იქნება სასიკეთო.
„ჩვენ არ გვჭირდება ომი და ჩვენ ამას ხელი არ უნდა შევუწყოთ. პირიქით, ჩვენ უნდა მოვუწოდოთ სიდინჯისკენ. ომი იქნება დამანგრეველი რეგიონისთვის და პირველ რიგში, უკრაინისთვის. მე არ მინდა, რომ ჩვენი ქვეყანა ასეთ სიტუაციაში აღმოჩნდეს“ – განაცხადა ფრიდონ ინჯიამ.
საპარლამენტო პოლიტიკური ჯგუფის თავმჯდომარის განცხადებით, ის სიმშვიდე, რაც დამკვიდრდა ამ წლების განმავლობაში, და რაც იქნა მიღწეული ამ ხელისუფლების ხელში, ამის დაკარგვა ნამდვილად არასწორი იქნება.
„გამოჩნდა რაღაც სხივი ურთიერთობის, ჩვენი ქვეყნის გამთლიანების მიმართულებით. მხედველობაში მაქვს რუსეთის ის განცხადება, რომელიც გულისხმობს 1997 წლის სტატუს-კვოს დაბრუნებას (ეს ქვეყნები, ეს ტერიტორიები და ბევრი სხვა). უნდა ითქვას, რომ წელს რუსეთის ფედერაციის საგარეო საქმეთა დღევანდელი მინიტრი, 1997 წელს იყო გაეროში რუსეთის წარმომადგენელი და ის ადასტურებდა და ხმას აძლევდა იმას, რომ საქართველო ერთიანი ქვეყანაა თავისი აფხაზეთით, სამაჩაბლოთი და ყველა დანარჩენით. ეს ჩვენთვის არის უმნიშვნელოვანესი და მათ ამ განცხადებაში შეიძლება ჩვენთვის სასიკეთო მივიღოთ და ამ რეზოლუციით, რომელიც არც ერთ ქვეყანას არ გაუკეთებია, ჩვენ არ აღმოვჩნდეთ დაპირისპირების ერთობაში და მხარედ არ გამოვიდეთ ჩვენ ვინმესთან“ – განაცხადა ფრიდონ ინჯიამ.
მისი თქმით, თუ რეზოლუციაში იქნება ისეთი რამ, რომელმაც შეიძლება ავნოს ქვეყნის დღევანდელ მდგომარეობას, და არ იქნება ისეთი რამ, რომელიც საქართვლოს შეუძლია მომავალში ქვეყნის სასარგებლოდ გამოიყენოს, რა თქმა უნდა, როგორც ფრიდონ ინჯია აღნიშნავს, მისი პოლიტიკური ჯგუფი, ამას მხარს არ დაუჭერს.
„ჩვენ მხარს არ დავუჭერთ ჩვენი ქვეყნის საწინააღმდეგო რეზოლუციას“ – აცხადებს ფრიდონ ინჯია.
„2022 წლის სახელმწიფო ბიუჯეტის პროექტი არ არის ორიენტირებული მოსახლეობის სოციალურ უზრუნველყოფაზე. თუ სახელმწიფო გარკვეულწილად არ აიღებს თავის თავზე ხალხის დაკმაყოფილებას სამუშაოთი, და არ გამონახავს მათი პრობლემების გადაჭრის გზებს, ძალიან მძიმე მდგომარეობაში იქნება მოსახლეობის ის 50%, რომელიც სოფლად ცხოვრობს“ – განაცხადა ფრიდონ ინჯიამ.
დღევანდელ შეხვედრას პოლიტიკური ჯგუფის აპარატის წევრებთან ერთად დარგის მოწვეული სპეციალისტებიც ესწრებოდნენ.
