საპარლამენტო პოლიტიკური ჯგუფის „ევროპელი სოციალისტების“ თავმჯდომარე ფრიდონ ინჯია მოულოდნელს უწოდებს თამარ ჟვანიას გადაწყვეტილებას ცენტრალური საარჩევნო კომისიის თავმჯდომარის თანამდებობიდან გადადგომის შესახებ.
„თამარ ჟვანიას გადაწყვეტილება ცენტრალური საარჩევნო კომისიის თავმჯდომარის თანამდებობიდან გადადგომის შესახებ ნამდვილად მოულოდნელი აღმოჩნდა ყველასთვის. მე როგორც, საქართველოს პარლამენტის 31 ოქტომბრის საპარლამენტო არჩევნების დროებითი საგამოძიებო კომისიის წევრმა, საკმაოდ სიღრმისეულად გავეცანი და შევისწავლე არჩევნებთან დაკავშირებით წარმოდგენილი მასალები. აქედან გამომდინარე, ნამდვილად თამამად შემიძლია ვთქვა, რომ თამარ ჟვანიას უწყების მხრიდან, 31 ოქტომბრის საპარლამენტო არჩევნების გაყალბებას ადგილი არ ჰქონია, თუ არ ჩავთვლით მხოლოდ მცირე ხარვეზებს და ტექნიკური ხასიათის შეცდომებს.“ – განაცხადა ფრიდონ ინჯიამ.
მისი თქმით, უნდა აღინიშნოს , რომ 8 ივლისს საგამოძიებო კომისია წარმოადგენს დასკვნას და დადგენილების პროექტს კომისიის მუშაობის შედეგებთან დაკავშირებით, რომლის მიხედვითაც კომისიამ უკვე შეიმუშავა საარჩევნო კომისიისადმი გარკვეული რეკომენდაციები.
„კომისიის მუშაობა შემიძლია შევაფასო როგორც მნიშვნელოვანი პროცესი, რომელმაც შესაძლებლობა მოგვცა სიღრმისეულად შეგვესწავლა კონკრეტული საარჩევნო უბნების საკითხები. კომისია დასკვნით ეტაპზეა და ვფიქრობ, შემუშავებული რეკომენდაციები და წინადადებები იქნება მნიშვნელოვანი ცენტრალური საარჩევნო კომისიის სამომავლო მუშაობისთვის“ – აღნიშნა ფრიდონ ინჯიამ.
პოლიტიკური ჯგუფის „ევროპელი სოციალისტების“ თავმჯდომარე თვლის, რომ არასწორი საქციელი იყო თამარ ჟვანიას მისამართით აგორებული ლანძღვა-გინებისა და შეურაცხყოფის კამპანია.
„პირადად მე, თამარ ჟვანიას, პარლამენტში საგამოძიებო კომისიის სხდომაზე შეხვედრისას ბოდიში მოვუხადე იმ უდიდესი წნეხის, ლანძღვა-გინებისა და შეურაცხყოფის გამო, რომელიც მისი მისამართით მთელი საარჩევნო პროცესისა და მის შემდეგაც გაისმოდა. მე ვთვლი, რომ ეს იყო არასწორი საქციელი თამარ ჟვანიას მიმართ და მას ნამდვილად არ ეკუთვნოდა ასეთი გამონათქვამები“ – განაცხადა ფრიდონ ინჯიამ.
მისი აზრით, შეიძლებოდა, რომ ეს არჩვენები გაცილებით კარგად ჩატარებულიყო, მაგრამ ამას ჰქონდა ბევრი ობიექტური მიზეზი, როგორც იყო, პანდემია, ქვეყანაში არსებული პოლიტიკური სიტუაცია, დაპირისპირება და ზეწოლა სხვადასხვა ჯგუფების მხრიდან თავიანთი პარტიული მიზნების განსახორციელებლად. სწორედ აქედან გამომდინარეობდა, გარკვეული ზეწოლა ცენტრალურ საარჩევნო კომისიაზე.
