Monthly Archives: February 2024

„თქვენი ყველა გამოსვლა, ყველა წინადადება, არის ანტისახელმწიფოებრივი, ანტიქართული, ყველაფერი მიმართულია იმისაკენ, რომ საქართველო გახდეს რუსეთის საწინააღმდეგო ქმედებების პლაცდარმი, როგორც ეს მოხდა უკრაინაში.“

ამის შესახებ საპარლამენტო პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ პარლამენტის პლენარულ სხდომაზე განაცხადა, სადაც საქართველოს პრეზიდენტი სალომე ზურაბიშვილი ყოველწლიური ანგარიშით წარდგა.

„უკრაინის მაგალითი, თქვენთვის მაგალითი არ არის, სადაც ასი ათასობით ადამიანია დახოცილი, ქვეყანა დანგრეულია. თქვენ წარმოიდგინეთ ჩვენს ხელისუფლებას რომ ჰქონოდა ანტისახელმწიფოებრივი პოზიცია, რა დღეში იქნებოდა დღეს საქართველო?!“ – მიმართა ფრიდონ ინჯიამ სალომე ზურაბიშვილს.

დეპუტატის განცხადებით, სწორედ, წინა ხელისუფლების პირობებში, მაპროვოცირებელმა და ანტიქართულმა ძალებმა მოიტანეს ის შედეგები, რაც ქვეყანამ 2008 წელს მიიღო.

„საქართველო ხომ პატარა ქვეყანაა და სულ არ სჭირდებოდა მას ასეულობით ბომბი. ყველამ კარგად ვიცით, 2008 წელს რა მოიტანა ანტიქართული ძალების ქმედებამ, რომლებიც დღესაც ბოგინობენ.

დღეს კი, ამ მაპროვოცირებელმა ძალებმა რა მოუტანა უკრაინას, ყველანი კარგად ვხედავთ. გადაკიდა ორი ერი ერთმანეთს. ჩვენთვის ეს მაგალითი უნდა იყოს“, – მიაჩნია ფრიდონ ინჯიას.

დეპუტატის აზრით, პრეზიდენტ ზურაბიშვილს იგნორირებული ჰყავს მილიონამდე ქართველი ემიგრანტი, რომელიც რუსეთის ფედერაციაში ცხოვრობს და ერთი ამდენივეა სხვადასხვა ქვეყანაში.

„თქვენ იგნორირებული გყავთ ქართველი ემიგრანტების ინტერესები, რომლებიც რუსეთის ფედერაციაში ერთ მილიონამდეა. ამდენივეა მსოფლიოს სხვადასხვა ქვეყნებში.“ – აღნიშნა დეპუტატმა.

პოლიტიკური ჯგუფის თავმჯდომარეს მიაჩნია, რომ საქართველო უნდა იყოს საქართველოსთვის და არა რომელიმე ქვეყნისთვის, ან ე.წ. ქვეყნების გაერთიანების დანამატი. პოლიტიკური პროცესები, რომელიც დღეს მსოფლიოში და მათ შორის, საქართველოში მიმდინარეობს, საკმაოდ რთულია, მაგრამ საქართველომ თავისი გეოპოლიტიკური მდგომარეობიდან გამომდინარე უნდა გააკეთოს ყველაფერი ქვეყნის ინტერესების გათვალისწინებით, მათ შორის, მაქსიმალურად გამოიყენოს სტრატეგიული პარტნიორობის თანამშრომლობის ახალი პერსპექტივები.

„საქართველო უნდა იყოს საქართველოსთვის და არა რომელიმე ქვეყნის ან, ქვეყნების გაერთიანების დანამატი. ეს პროცესები ძალიან რთულია ჩვენი პატარა ქვეყნისთვის, მაგრამ ჩვენი გეოპოლიტიკური მდებარეობიდან გამომდინარე, ეს შესაძლებელია, და ამისთვის ჩვენ ყველაფერი უნდა გავაკეთოთ, ყველამ ერთად და მაქსიმალურად უნდა გამოვიყენოთ ჩვენი გეოპოლიტიკური მდებარეობა. მათ შორის, ჩვენი სტრატეგიული პარტნიორობის ასპექტები და არსებული ახალი პერსპექტივები, რომელიც ქვეყანას გააჩნია ჩინეთის სახალხო რესპუბლიკასთან მიმართებაში“, – აღნიშნა ფრიდონ ინჯიამ.

„ჩვენ უნდა ვიყოთ მისაღები ჩვენი სამეზობლოსთვის. ეს იქნება ჩვენი ქვეყნის გადარჩენა და არა ის ანტისახელმწიფოებრივი შტაბის შექმნა, სადაც კოჰაბიტაციით გადარჩენილი ანტისახელმწიფოებრივი ჯგუფების ნამსხვრევები შეიკრიბება.

მე მოგიწოდებთ თქვენ, თუ საქართველო მართლაც გინდათ, რომ დაადგეს სწორ გზას, იყოს დამოუკიდებელი, მისაღები ყველასთვის და არავის დიქტატის ქვეშ არ იყოს, თუ შეგიძლიათ ჯერ კიდევ რამე, დაელაპარაკეთ ხალხს, როგორც პრეზიდენტი. გაიარეთ და ნახეთ, რა უჭირს ხალხს, და როგორ შეგვიძლია ჩვენ ერთად დავეხმაროთ ჩვენს მოსახლეობას“, – მიმართა ფრიდონ ინჯიამ სალომე ზურაბიშვილს.

დეპუტატმა ქვეყნის პრეზიდენტს ხელისუფლებასთან კონსტრუქციული თანამშრომლობისკენ მოუწოდა.

„იყო ოპოზიციაში ეს ნიშნავს იმას, რომ შენი პოზიცია დააფიქსირო, თუ რა ჯობია ხალხისთვის. აჩვენო და შესთავაზო ხელისუფლებას არსებული პრობლემების გადაჭრის გზები.“

„ჩვენ მცირერიცხოვანი პარტია ვართ, მაგრამ ჩვენი იდეები, ჩვენი პოზიცია, პარტიის კონცეფცია, ძალიან ახლოს არის ხალხთან, ხალხის ინტერესებთან. ჩვენ არ აგვირჩევია ეს ხელისუფლება და ხმა არ მიგვიცია მისთვის, მაგრამ იყო კანონები, იყო გადაწყვეტილებები, რომელსაც ჩვენ მხარი დავუჭირეთ, რადგანაც მიგვაჩნდა, რომ ეს იყო ქვეყნისთვის სასიკეთო, რასაც მომავალშიც გავაკეთებთ“, – დასძინა ფრიდონ ინჯიამ.

https://fb.watch/qltafimCas/

📍 საქართველოს პარლამენტში ახალი სამთავრობო ცვლილებების ფარგლებში 3 კომიტეტის (განათლების, მეცნიერებისა და ახალგაზრდულ საქმეთა, კულტურის, სპორტის და ჯანმრთელობის დაცვისა და სოციალურ საკითხთა) გაერთიანებულ სხდომაზე, ჯანდაცვის, განათლებისა და მეცნიერების, კულტურისა და სპორტის მინისტრობის კანდიდატებს მოუსმინეს, რომლებმაც გაერთიანებული კომიტეტების სხდომაზე სამთავრობო პროგრამა წარადგინეს.

🔷 საპარლამენტო პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ კულტურის, სპორტისა და ახალგაზრდობის მინისტრობის კანდიდატს თეა წულუკიანს აბედათის სამონასტრო კომპლექსთან დაკავშირებით დაუსვა შეკითხვა, თუ როგორია მინისტრობის კანდიდატის ხედვა ამ უძველესი ისტორიული მნიშვნელობის სამონასტრო კომპლექსის სარეაბილიტაციო სამუშაოებთან დაკავშირებით.

🔷 „უდაო, რომ ეს ძეგლი უნდა გადარჩეს. მე იმედი მაქვს, რომ თქვენ სწორ გეგმას შეიმუშავებთ ამასთან დაკავშირებით. მით უმეტეს, თქვენ ეს საკითხი გულთან ახლოს მიიტანეთ, ჩახვედით და ადგილზე გაეცანით აბედათის სამონასტრო კომპლექსის ირგვლივ არსებულ სიტუაციას.“ – აღნიშნა ფრიდონ ინჯიამ.

🔷 დეპუტატის განცხადებით, სახელმწიფოში უმნიშვნელოვანეს როლს ასრულებს კულტურის სფეროს განვითარება. 30 წლის განმავლობაში საქართველოში ეს სფერო იყო მიტოვებული.

🔷 „კულტურა ეს არის იდეოლოგიისა და პოლიტიკის ნაწილი. კულტურა ნებისმიერი ქვეყნის განვითარებაში უდიდეს როლს ასრულებს. კულტურის გარეშე ქვეყანაში იდეოლოგია არ ყალიბდება.“ – განაცხადა ფრიდონ ინჯიამ.

🔷 რაც შეეხება შეკითხვებს განათლებისა და მეცნიერების მინისტრობის კანდიდატთან გიორგი ამილახვართან, დეპუტატმა თავის გამოსვლაში ყურადღება გაამახვილა სამეცნიერო კვლევითი ერთეულების რანჟირების საკითხთან დაკავშირებით, რაზეც მინისტრობის კანდიდატმა თავის მოხსენებაში ისაუბრა. დეპუტატის თქმით, მისასალმებელია, სამინისტროს მხრიდან სამეცნიერო კვლევით ერთეულებთან დაკავშირებით ასეთი მიდგომა.

🔷 „ამ თვალსაზრისით მნიშვნელოვანია სახელმწიფომ მოიზიდოს საზღვარგარეთ მყოფი საქართველოს მოქალაქეები, რომლებიც მეცნიერების დარგში არიან დაკავებულნი და არა მარტო ისინი, არამედ მათი კოლეგებიც. ამ მხრივ უპრიანი იქნება მოხდეს ამ მიმართულების ერთობლივი კომერციალიზაცია. ეს ძალიან მნიშვნელოვანი და ძალიან საჭირო მიმართულებაა. ასეთი მიდგომა მე არცერთი მინისტრისგან არ მომისმენია, რომ ყოველ წელს იქნება მეტი და მეტი დაფინანსება სამეცნიერო კვლევითი სამუშაოები ჩასატარებლად“. – აღნიშნა დეპუტატმა.

🔷 ფრიდონ ინჯიამ თავის გამოსვლაში ასევე, ყურადღება გაამახვილა საქართველოში მეცნიერებათა აკადემიის მნიშვნელობაზე და აღნიშნა, მიუხედავად იმისა, რომ მეცნიერებათა აკადემია არ შედის განათლებისა და მეცნიერების სამინისტროს სისტემაში, მნიშვნელოვანია სამინისტრომ უფრო მეტად გამოიყენოს მეცნიერებათა აკადემიის პოტენციალი.

🔷 „მიმაჩნია, რომ მეცნიერებათა აკადემიაში არის დიდი პოტენციალი და თუ თქვენ ამ პოტენციალს გამოიყენებთ, დარწმუნებული ვარ სამინისტროს მუშაობის შედეგები გაცილებით მაღალ დონეზე იქნება ჩვენი ქვეყნის საკეთილდღეოდ. უნდა გითხრათ, რომ საქართველო, ყოველთვის გამოირჩეოდა ძლიერი მეცნიერებით, სრულყოფილი ტექნოლოგიებითა და გამოგონებებით, სიახლეების დანერგვით.“ – განაცხადა დეპუტატმა.

🔷 პოლიტიკური ჯგუფის თავმჯდომარემ გაერთიანებული კომიტეტების სხდომაზე ხაზი გაუსვა სახელმწიფოში ფარმაცევტული კომპანიის შექმნის აუცილებლობაზე, რომელიც დეპუტატის განცხადებით, მნიშვნელოვანი წინ გადადგმული ნაბიჯი იქნება ქვეყანაში მედიკამენტებზე ფასების დარეგულირების თვალსაზრისით.

🔷 „ყოფილი პრემიერის მხრიდან იყო მცდელობა, რომ დაებალანსებინა მედიკამენტებზე ფასების საკითხი, რომ 400-500 %-იანი მოგება არ ჰქონოდათ ფარმაცევტულ კომპანიებს, მაგრამ პრობლემის გადაჭრა საბოლოოდ ვერ მოხერხდა. ამიტომ აუცილებლად მიმაჩნია, შეიქმნას ერთი მაინც, სახელმწიფო ფარმაცევტული საწარმო, რომელიც ამ პრობლემის გადაჭრას შეძლებს.

🔷 ერთი ფარმაცევტული საწარმოს შექმნას დაახლოებით 8-9 მილიონი ევრო დასჭირდება, რომელიც შეძლებს გამოუშვას დაახლოების 150 დასახელების წამალს. ამ საწარმოს გახსნას არ სჭირდება სავალუტო ფონდის, ან რომელიმე საერთაშორისო ორგანიზაციის თანხმობა. ეს საკითხი თქვენს კომპეტენციაშია“. – მიმართა ფრიდონ ინჯიამ ჯანდაცვის მინისტრობის კანდიდატს ზურაბ აზარაშვილს.

🔷 „დღეს დღეისობით პრაქტიკულად შეუძლებელია მედიკამენტებზე ფასების გაკონტროლება. ეს შესაძლებელია მხოლოდდამხოლოდ სახელმწიფო ფარმაცევტული საწარმოს არსებობის პირობებში. ეს იქნება სახელმწიფო ფარმაცევტული საწარმო მინიმალური მოგებით, დაახლოებით 10-15 % ის ფარგლებში. სამაგიეროდ, ამ საწარმოს მიერ გამოშვებული 150 დასახელების წამალი იქნება ხელმისაწვდომი მოსახლების გარკვეული კატეგორიისთვის, როგორიც არიან პენსიონერები, სოციალურად დაუცველი პირები. ამასთანავე, ამით დარეგულირდება ფარმაცევტულ ბაზარზე დღეს არსებული ვითარება“. – აღნიშნა ფრიდონ ინჯიამ.

🔷 დეპუტატმა თავის გამოსვლაში, ასევე ყურადღება გაამახვილა სახელმწიფოში არსებულ დემოგრაფიულ პრობლემასთან დაკავშირებით და მინისტრობის კანდიდატს ზურაბ აზარაშვილს მიმართა შეკითხვით თუ რა ხედვები და წინადადებები აქვს მას ამ პრობლემის გადასაჭრელად.

🔷 „სოფლები დაიცალა. მოსახლეობას უნდა ჰქონდეს მოტივაცია იცხოვროს და გამრავლდეს სოფლად. ამისთვის კი, მნიშვნელოვანია სახელმწიფომ შექმნას ღირსეული ცხოვრების პირობები. მოსაფიქრებელია ეფექტური მექანიზმი, რომელიც სოფლებში დღეს არსებული პრობლემების გადაჭრის გზებს გვიჩვენებს. გთხოვთ წარმოგვიდგინეთ თქვენი ხედვა ამ მიმართულებით“. – აღნიშნა დეპუტატმა.

📍 საქართველოს პარლამენტში ახალი სამთავრობო ცვლილებების ფარგლებში 4 კომიტეტის (იურიდიულ საკითხთა, ადამიანის უფლებათა დაცვისა და სამოქალაქო ინტეგრაციის, თავდაცვისა და უშიშროების და საპროცედურო საკითხთა და წესების) გაერთიანებულ სხდომაზე თავდაცვის, იუსტიციის, შინაგან საქმეთა და შერიგებისა და სამოქალაქო თანასწორობის საკითხებში სახელმწიფო მინისტრობის კანდიდატებს მოუსმინეს, რომლებმაც გაერთიანებული კომიტეტების სხდომაზე სამთავრობო პროგრამა წარადგინეს.

🔷 ფრიდონ ინჯიას განცხადებით, რადიკალური ოპოზიციური პარტიების წარმომადგენელთა რიტორიკისთვის რომ დაეჯერებინა ქვეყნის ხელისუფლებას, სახელმწიფო დღეს ომში იქნებოდა ჩართული. ამიტომ, დასაფასებელია, ის პოლიტიკური ნაბიჯები და სახელმწიფოებრივი მიდგომა, რაც ხელისუფლებამ ამ რთულ პერიოდში გამოიჩინა.

🔷 „მადლობა მინდა ვუთხრა ხელისუფლებას იმისთვის, რომ საქართველოში მშვიდობაა. მშვიდობა, რომელმაც განაპირობა ის ეკონომიკური წინსვლა, რაც დღეს საქართველოშია. ხაზი მინდა გავუსვა იმ ფაქტს, რომ საქართველოში დღეს არსებული ეკონომიკური მაჩვენებელი ევროპის ბევრ ქვეყანას და ჩვენს სამეზობლოსაც კი უსწრებს“. – განაცხადა ფრიდონ ინჯიამ.

🔷 დეპუტატმა კომიტეტის სხდომაზე შინაგან საქმეთა მინისტრობის კანდიდატს ვახტანგ გომელაურს მიმართა და აღნიშნა, რომ საქართველოში ნარკომანიასთან ბრძოლის საკითხთან დაკავშირებით კანონმდებლობა გარკვეულ წილად ლიბერალურია.

🔷 „როგორი ხედვა გაქვთ ნარკომანიის წინააღმდეგ ბრძოლასთან დაკავშირებით, ხომ არ უნდა გამკაცრდეს კანონმდებლობა ნარკომანიასთან ბრძოლის წინააღმდეგ? ვფიქრობ, ამ მხრივ გაცილებით უკეთესი მდგომარეობაა ჩვენს მეზობელ, განსაკუთრებით აზიურ ქვეყნებში. მიმაჩნია, რომ ამ თავლსაზრისით ჩვენთან კანონმდებლობა გარკვეულწილად ლიბერალურია“. – განაცხადა ფრიდონ ინჯიამ.

🔷 პოლიტიკური ჯგუფის თავმჯდომარეს მიაჩნია, რომ დღეს არსებული იუსტიციის სახლები, სადაც დანერგილია სხვადასხვა ინოვაციური სერვისები, მსოფლიოში ერთერთი სამაგალითოა.

🔷 „დიდი მიგნება და სამაგალითოა, მომსახურეობის ის სფეროები, რომლებიც დანერგილია იუსტიციის სახლებში“. – აღნიშნა დეპუტატმა.

🔷 რაც შეეხება თავდაცვის მინისტრობის ახალ კანდიდატს ირაკლი ჩიქოვანს, როგორც ფრიდონ ინჯიამ განაცხადა, ირაკლი ჩიქოვანის განვლილ ცხოვრებასა და გამოცდილებას თუ დავეყრდნობით, მის კანდიდატურასთან დაკავშირებით თავდაცვის მინისტრობის პოზიციაზე, უარყოფითი შეფასება შეუძლებელია.

🔷 დეპუტატმა ირაკლი ჩიქოვანს მიმართა თხოვნით, ყურაღება გაამახვილოს გარკვეულ სამხედრო ბაზებზე ინფრასტრუქტურისა და ზოგადად ამ სფეროში წესრიგის დამყარების საკითხებზე.

🔷 თავის მხრივ, შინაგან საქმეთა მინისტრობის კანდიდატმა ვახტანგ გომელაურმა ფრიდონ ინჯიას კითხვის პასუხად აღნიშნა, რომ ნარკომანიის პრობლემასთან დაკავშირებით არ არის საკმარისი მხოლოდ კანონმდებლობის გამკაცრება, ამ საკითზე საჭირო და აუცილებელია კომპლექსური მიდგომა და შესაბამისი სამუშაოების ჩატარება.