ყოველთვიური არქივები: მაისი2022

🔹 საქართველოს ყველა რეგიონში მუნიციპალური საავადმყოფოების არსებობის აუცილებლობისა და სახელმწიფო ფარმაცევტული საწარმოს შექმნის შესახებ ისაუბრა საპარლამენტო პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ ქვეყნის უმაღლეს საკანონმდებლო ორგანოში სიტყვით გამოსვლისას, სადაც „მინისტრის საათის“ ფორმატში ჯანდაცვისა და სოციალური უზრუნველყოფის მინიტრს ზურაბ აზარაშვილს მოუსმინეს.

🔹 „ბოლო პერიოდში, 95 % – ი პოლიკლინიკებისა და საავადმყოფოებისა, რომელიც იყო სახელმწიფოს დაქვემდებარებაში, გაიყიდა, და პანდემიიდან გამომდინარე, თქვენ იძულებულები იყავით დამატებით მილიონობით ლარი გადაგეხადათ უკვე კერძო სამედიცინო დაწესებულებებისთვის. ღმერთმა ნუ ქნას მოხდეს მსგავსი პანდემიები, მაგრამ ქვეყანა ყოველთვის მზად უნდა იყოს ყველაფრისთვის. აქედან გამომდინარე, მე გავხსნიდი ყველა რეგიონში მუნიციპალურ საავადმყოფოებს. ამის გაკეთება თანამედროვე ტექნოლოგიებით გაცილებით უფრო იოლია, ვიდრე ძველი საავადმყოფოების აღდგენა, რომელიც საბჭოთა პერიოდში იყო აშენებული სხვადასხვა სტანდარტებით. მუნიციპალური საავადმყოფოები აუცილებელია იყოს ყველა რეგიონში და ამის გაკეთება თავისუფლად არის შესაძლებელი. ასევე მომავალში მნიშვნელოვანია გაიხსნას ამბულატორიები ისეთ დაბასა და სოფლებში, სადაც მოსახლეობის რაოდენობა აღემატება 3000 მაცხოვრებელს.“ – განაცხადა ფრიდონ ინჯიამ.

🔹 დეპუტატის თქმით, იგი მიესალმება სახელმწიფოში მედიკამენტებზე ფასების დაწევას, მაგრამ მიაჩნია, რომ ეს არის დროებითი.

🔹 „მინდა ყურადღება გავამახვილო მედიკამენტებზე ფასების დაწევის საკითხზე. მართლაც, რომ მისასალმებელია ეს გადაწყვეტილება. ეს იყო პირადად პრემიერ მინისტრის ირაკლი ღარიბაშვილის ინიციატივა და დიდი საქმე გააკეთა მან ამით, მაგრამ მე მიმაჩნია, რომ ერთ წელიწადში ან წელიწად ნახევარში შეიძლება სიტუაცია შეიცვალოს. მე მაინც ვფიქრობ, რომ ეს არის დროებითი, მაშინ როცა წამლების მწარმოებლები არიან კერძო კომპანიები. აქ ერთი რამ არის გასაკეთებელი აუცილებლად. მე ამაზე მქონდა საუბარი ადრეც, ჯანდაცვის სამინიტრომ თავის დაქვემდებარებაში უნდა შექმნას ფარმაცევტული საწარმო მინიმუმ ერთი მაინც. ევროპის წამყვან ქვეყნებში ნახევარი სამედიცინო დაწესებულებების არის სახელწიფოს დაქვემდებარებაში, ხოლო ნახევარი ეკუთვნის კერძო კომპანიებს. სახელმწიფოს დაქვემდებრებაში მყოფი ფარმაცევტული საწარმო გამოუშვებს იმ წამლებს, რომელიც არის ყველაზე მოთხოვნადი, რომელიც ყველაზე მეტად სჭირდება ჩვენს მოსახლეობას. სწორედ მაშინ შეძლებთ თქვენ, რომ დაარეგულიროთ მედიკამენტებზე ფასები. ეს არის პრობლემის ერთადერთი გადაწყვეტა და მე ამ საკითხზე უკვე მერამდენედ ვსაუბრობ და ვიმეორებ და დარწმუნებული ვარ, რომ ეს ასეა.“ – განაცხადა ფრიდონ ინჯიამ.

🔹 ფრიდონ ინჯიამ თავის გამოსვლაში ჯანდაცვის სისტემის მუშაობა შეაფასა პანდემიის პერიოდში და აღნიშნა, რომ საქართველოს ჯანდაცვის სისტემამ ამ გამოწვევას გაუძლო.

🔹 „უნდა გითხრათ, რომ მართლაც ეს ორი წელი ამ სისტემის გამოცდა იყო. ჯანდაცვის სისტემამ და ამ გუნდმა გააკეთა ის, რაც უნდა გაეკეთებინა. თუმცა, ამ პერიოდში ბევრი რამ გამოჩნდა ისეთიც, რაც გამოსასწორებელია. პანდემიამ აჩვენა, რომ ქვეყანაში სამედიცინო პერსონალის დეფიციტია, როგორც კვალიფიკაციის მხრივ, ასევე, რაოდენობრივადაც. რა თქმა უნდა, ისინი გმირები არიან, რაც მათ გააკეთეს ამ მოკლე პერიოდში, ისწავლეს კიდევაც და გამოცდილება მიიღეს“ – აღნიშნა პოლიტიკური ჯგუფის თავმჯდომარემ.

🔹 ფრიდონ ინჯიამ ჯანდაცვის მინიტრს მოუწოდა, რომ მისმა უწყებამ ყურადღება გაამახვილოს და გააძლიეროს კონტროლი სხვადასხვა კერძო კლინიკებში ფინანსურ ხარჯთაღრიცხვასთან დაკავშირებით, ვინაიდან, მისი თქმით, არსებობს მაგალითები, როცა პაციენტებს ამა თუ იმ სამედიცინო კლინიკებში გაორმაგებულ ხარჯთაღრიცხვას წარუდგენენ.

🔹 ამასთანავე, პოლიტიკური ჯგუფის თავმჯდომარეს აუცილებელ პირობად მიაჩნია სამედიცინო პერსონალთათვის სპეციალური წამახალისებელი, კომპლექსური, სამთავრობო პროგრამის შემუშავება, რაც მნიშვნელოვანი წინ გადადგმული ნაბიჯი იქნება ჯანდაცვის სისტემის განვითარების თავლსაზრისით.

📌 საქართველოს პარლამენტის პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ მონაწილეობა მიიღო ეუთო-ს დემოკრატიული ინსტიტუტებისა და ადამიანის უფლებათა ოფისის (ODIHR) დირექტორის, მატეო მეკაჩის და თანმხლები დელეგაციის წევრებთან შეხვედრაში, რომელიც ქვეყნის უმაღლეს საკანონმდებლო ორგანოში საპარლამენტო ოპოზიციის წარმომადგენლებთან გაიმართა.

ფრიდონ ინჯიამ შეხვედრაზე ODIHR -ის დირექტორს მატეო მეკაჩის და დელეგაციის წევრებს მადლობა გადაუხადა იმ სამუშაოსთვის, რომელიც მათ გაწიეს საქართველოში ახალი საარჩევნო სისტემის ფორმირებისთვის.

„ეუთო/ოდირს საქართველოში ახალი საარჩევნო სისტემის ფორმირებაში დიდი როლი მიუძღვის. კოდექსის შემუშავებაში მონაწილეობას ვიღებდით ჩვენ „ევროპელი სოციალისტები“ და ასევე „მოქალაქეები“. დღეს მოქმედი საარჩევნო კოდექსი წინა საარჩევნო კოდექსთან შედარებით განსხვავდება როგორც ცა და დედამიწა. ეს არის წინ გადადგმული ნაბიჯი და ამაში ძალიან დაგვეხმარა ეუთო/ოდირი“, – განაცხადა შეხვედრაზე ფრიდონ ინჯიამ.

პოლიტიკური ჯგუფის თავმჯდომარის თქმით, იგი არ ეთანხმება შეხვედრაზე გამოთქმულ მოსაზრებას „ნაციონალური მოძრაობის“ წარმომადგენლის მხრიდან, თითქოს დღეს საქართველოში საზოგადოება არის პოლარიზებული.

„მე არ ვეთანხმები „ნაციონალური მოძრაობის“ დასკვნას და განცხადებას, რომ საზოგადოება პოლარიზებულია. მე ვიტყოდი, რომ დღეს საქართველოში პოლარიზებულია ორი-სამი პარტია. ერთ მხარეს არის „ოცნება“, ხოლო მეორე მხარეს – „ნაციონალური მოძრაობა“ და კიდევ რამდენიმე პარტია. ეს არის პოლარიზაცია ამ ორ პარტიას შორის, ხოლო საზოგადოებაში, განსაკუთრებით რაიონებში, სოფლებში საერთოდ არ არის. ასე, რომ ეს არის მოგონილი. კიდევ ერთხელ ვიმეორებ, რომ პოლარიზაცია არის პირველ პირებს შორის. აქედან არის სააკაშვილი და იქედან კი, „ოცნების“ ხელმძღვანელობა“, – აღნიშნა ფრიდონ ინჯიამ.

როგორც შეხვედრაზე დეპუტატმა განაცხადა, მნიშვნელოვანია, მიღებულ იქნას გადაწყვეტილება კონსტიტუციაში ცვლილებების შეტანის შესახებ, რომელიც იქნება წინ გადადგმული ნაბიჯი იმისათვის, რომ პარლამენტი იყოს მრავალპარტიული.

„ეს საკითხი არის უმნიშვნელოვანესი დღეს, რადგან ასეთ პატარა ქვეყანაში, როგორიც საქართველოა ამდენი პარტიაა, და ამ ცვლილებების შედეგად, პარლამენტი იქნება მრავალპარტიული, რომელიც მოსახლეობის ინტერესებს გამოხატავდა“, – განაცხადა ფრიდონ ინჯიამ.
ევროკავშირში საქართველოს გაწევრიანებასთან დაკავშირებით, დეპუტატმა აღნიშნა, რომ აუცილებელია დიდი შრომა და ეს არ არის მარტივი პროცესი, ყველაზე მთავარი კი, სახელმწიფოში კანონის უზენაესობაა.
„იმისათვის, რომ ევროკავშირში გაწევრიანების მიმართულებით გადაიდგას ნაბიჯები, საჭიროა როგორც ხელისუფლების, ასევე ოპოზიციის მხრიდან გამოინახოს საერთო ენა და მიმაჩნია, რომ საერთო ენის გამონახვა შესაძლებელია მაშინ, როდესაც ქვეყანაში კანონის უზენაესობაა. ვინც არის დამნაშავე, ის უნდა იჯდეს ციხეში, არ აქვს მნიშვნელობა რომელი პარტიის წარომადგენელია, ან ვინ არის,“ – განაცხადა შეხვედრაზე ფრიდონ ინჯიამ.