Category Archives: სიახლეები

🇬🇪🌳🇯🇵
საქართველო – იაპონიის დიპლომატიური ურთიერთობების 30 წლისთავთან დაკავშირებით თბილისის მოსწავლეთა ახალგაზრდობის ეროვნული სასახლის ეზოში იაპონიის საელჩოს ეგიდით საკურას ნერგების დარგვის ცერემონიალი გაიმართა.

🌳 როგორც ცერემონიალზე აღინიშნა, დღეს დარგული საკურას ხეები ორ ქვეყანას შორის არსებული მეგობრობის სიმბოლოა.

🔹 საპარლამენტო პოლიტიკური ჯგუფის „ევროპელი სოციალისტების“ თავმჯდომარე ფრიდონ ინჯია მიმართავს საქართველოს მთავრობას, რომ უკრაინიდან ლტოლვილებისთვის საქართველოს სოფლებში გამოინახოს მიტოვებული სახლ-კარი, რომელიც მათ დროებით მფლობელობაში გადაეცემათ, რითაც ქართველი კაცი თავის ვალს მოიხდის.
🔹 ამის შესახებ ფრიდონ ინჯიამ პარლამენტის პლენარულ სხდომაზე განაცხადა, სადაც „მინისტრის საათის“ ფორმატში გარემოს დაცვისა და სოფლის მეურნეობის მინიტრს ოთარ შამუგიას მოუსმინეს.
🔹 ფრიდონ ინჯიამ საპარლამენტო ტრიბუნიდან მიმართა ოთარ შამუგიას, თავის გუნდთან ერთად და სოფლების მუნიციპალიტეტების გვერდში დგომით სათავეში ჩაუდგეს ამ საქმეს.
🔹 „თითქმის ყველა სოფელში არის მიტოვებული სახლ-კარი. გავუწიოთ ლტოლვილებს უკრაინიდან დახმარება რითაც შეგვეძლება. ამით ჩვენ საქართველოს საქმესაც გავაკეთებთ. მიწები დამუშავდება, ხალხიც შეგვემატება და სოფელში ლამაზი უკრაინული ოჯახი იქნება, რომელსაც მთელი სოფელი მოუვლის. ასე გამაგრდებიან ისინი სოფლად და თუ ვერ გამაგრდებიან, ჩვენ ქართველი კაცის ვალს მაინც მოვიხდით, და მე დარწმუნებული ვარ, რომ ისინი ამით კმაყოფილები იქნებიან. ასე იყო, ჩემო მეგობრებო, მეორე მსოფლიო ომის დროს, როცა იყო მძიმე პერიოდი, და უკრაინელების მთელი ჯგუფები ჩამოვიდა საქართველოში, რომლებსაც აფხაზეთში ავუშენეთ თეთრი (ე.წ. უკრაინული ხატა) სახლები და ისინი დღესაც იქ ცხოვრობენ“, – განაცხადა ფრიდონ ინჯიამ.
🔹 ამ საკითხთან დაკავშირებით, როგორც დეპუტატმა სხდომაზე აღნიშნა, იგი მიმართავს არა მხოლოდ გარემოს დაცვისა და სოფლის მეურნეობის მინიტრს, არამედ საქართველოს პრემიერ-მინისტრს ირაკლი ღარიბაშვილს. 🔹 „გვერდში დავუდგეთ ამ უმძიმეს მდგომარეობაში მყოფ ჩვენს ძმებს ლტოლვილებს უკრაინიდან და თქვენ, როგორც სოფლის მეურნეობის მინისტრი, ჩაუდექით სათავეში ამ საქმეს სოფლის მუნიციპალიტეტებთან ერთად, და თუ ჩვენგან იქნება დახმარება საჭირო, ყველაფერს გავაკეთებთ ამისთვის“, – აღნიშნა ფრიდონ ინჯიამ.

🔹 საპარლამენტო პოლიტიკური ჯგუფის „ევროპელი სოციალისტების” თავმჯდომარემ ფრიდონ ინჯიამ საქართველოს პარლამენტის პლენარულ სხდომაზე გარემოს დაცვისა და სოფლის მეურნეობის სამინისტროს მუშაობა შეაფასა.
🔹 ქვეყნის უმაღლეს საკანონმდებლო ორგანოში “მინისტრის საათის” ფორმატში გარემოს დაცვისა და სოფლის მეურნეობის მინისტრს ოთარ შამუგიას მოუსმინეს.
🔹 ფრიდონ ინჯიას განცხადებით, სოფლის მეურნეობა უმნიშვნელოვანესი დარგია ქვეყნის სამთავრობო სტრუქტურაში, და ამ სამინისტროს გამართულ მუშაობაზე ბევრი რამ არის დამოკიდებული ქვეყნის საკეთილდღეოდ.
🔹 პოლიტიკური ჯგუფის თავმჯდომარემ დადებითად შეაფასა სამინისტროს მუშაობა აზიურ ფაროსანასთან ბრძოლის საქმეში და აღნიშნა, რომ უწყებამ სერიოზული სამუშაო ჩაატარა ამ მიმართულებით და მართლაც, მაღალ დონეზე შეასრულა აზიურ ფაროსანასთან ბრძოლის სამუშაო.
🔹 ფრიდონ ინჯიამ თავის გამოსვლაში ყურადღება გაამახვილა დასავლეთ საქართველოში, რიკოთის უღელტეხილზე მიმდინარე ინფრასტრუქტურულ სამუშაოებთან დაკავშირებით და მინისტრს მიმართა თხოვნით დაინტერესდეს იქ მიმდინარე სამუშაოებით, ვინაიდან შეშფოთებას იწვევს დღეს არსებული მდგომარეობა.
🔹 „სამუშაოები, რომელიც იქ მიმდინარეობს, უმნიშვნელოვანესია როგორც რეგიონისთვის, ასევე ქვეყნისთვის. მოგმართავთ თხოვნით, აიყვანოთ ცალკე კონტროლზე აღნიშნული საკითხი. გთხოვთ, ჩაიხედოთ იმ 4 კომპანიის ხელშეკრულებაში, რომლებიც ამ ტერიტორიაზე სხვადასხვა მონაკვეთში ახორციელებენ სამუშაოებს, რომ თავიანთი მუშაობის პარალელურად ამ კომპანიებმა ბუნების დაცვის სამუშაოების ჩატარებაზეც იზრუნონ. ისე არ მოხდეს, რომ მომავალში დანგრეული მთა და ფერდობები შეგვჩრეს და მერე ცალკე სამუშაოების ჩატარება მოგვიწიოს“, – განაცხადა ფრიდონ ინჯიამ.
🔹 პოლიტიკური ჯგუფის თავმჯდომარე მიიჩნევს, რომ განსაკუთრებულ ყურადღებას მოითხოვს სოფლის მეურნეობის პროდუქცია, რომელიც იწარმოება საქართველოში.
🔹 „მიმაჩნია, რომ სოფლის მეურნეობის პროდუქცია, რომელიც საქართველოში იწარმოება უნდა იყოს პრივილეგირებული და ჩვენ უნდა გამოვნახოთ გზები იმისათვის, რომ ჩვენს ქვეყანაში წარმოებული პროდუქცია დავიცვათ“, – აღნიშნა დეპუტატმა.
🔹 ამასთანავე, ფრიდონ ინჯიას აზრით, მნიშვნელოვანია საქართველოში ბიო პროდუქტების წარმოების ხელშეწყობა ხელისუფლების მხრიდან.
🔹 „საქართველო გამოირჩევა არომატული ხილით. ამიტომ, კარგი იქნება, თუკი დავაინტერესებთ მეწარმეებს, ფერმერებს და ამ მიმართულებით სწორი იქნებოდა გარკვეული წამახალისებელი პროექტების შექმნა. ეს მთავრობის პრეროგატივაა“, – განაცხადა ფრიდონ ინჯიამ.
🔹 დეპუტატის აზრით, ქვეყნის ეკონომიკისთვის ძალიან მნიშვნელოვანია ის სამთავრობო პროგრამები, რომლებიც ხორციელდება სოფლის მეურნეობის დარგის განვითარების თვალსაზრისით, მაგრამ დღეს არსებული პროგრამები, ხშირ შემთხვევაში არ არის ხელმისაწვდომი ყველასთვის, კერძოდ, გლეხისთვის, მცირე მეწარმეთათვის და საჭიროა მთავრობამ იფიქროს ამ პროგრამების გამარტივების გზებზე.
🔹 საპარლამენტო ტრიბუნიდან ფრიდონ ინჯიამ ასევე, ყურადღება გაამახვილა წყლის კოდექსში ცვლილებებთან დაკავშირებით და აღნიშნა, რომ მისასალმებელია ის შრომა, რომელიც მთავრობა ამ მიმართულებით გაწია.
🔹 „წყალი ჩვენი ქვეყნისთვის გახლავთ სტრატეგიული მნიშვნელობის და მიმაჩნია, რომ ეს უნდა იყოს დაფიქსირებული საკანონმდებლო დონეზე. დადგება დრო და წყალს ნავთობზე მეტი ფასი ექნება“, – აღნიშნა ფრიდონ ინჯიამ.
🔹 დეპუტატის აზრით, მნიშვნელოვანია დღის წესრიგში დადგეს სახნავ-სათესი მიწების მაქსიმალურად გამოყენების საკითხი.
🔹 „წლების უკან, უცხოელებმა, მათ შორის, შეიძლება ჩვენმა თანამემამულეებმაც, შეიძინეს სახნავ-სათესი მიწები, რომელიც არ არის დამუშავებული სხვადასხვა მიზეზის გამო. ზოგი ელოდება კარგ ფასში გაყიდვას, ზოგს არ აქვს საშუალება დასამუშავებლად, ამიტომ, ხომ არ არის გასაკეთებელი ისეთი რამ, რაც ამ მიწების გამოყენებას უფრო ეფექტურს გახდის. ნათქვამია, რომ მიწა არ იწარმოება. ამიტომ, რაც გვაქვს ჩვენ მიწა საქართველოში, მეტი მიწა არ გვექნება”,- განაცხადა ფრიდონ ინჯიამ.

🔹 “აქედან გამომდინარე, ხომ არ არის მიზანშეწონილი, სამინიტრომ, შესაბამის ორგანოებთან ერთად, მოამზადოს კანონმდებლობა, რომელიც გაამკაცრებს ამ საკითხს. რა მაქვს მხედველობაში, სახნავ-სათესი მიწა, რომელიც ადრე მუშავდებოდა, ახლა არ მუშავდება და არის გაველურებული და მიწის გადასახადს ერთნაირად იხდის ის, ვინც ამუშავებს მიწას და ისიც, ვინც არ ამუშავებს მიწას. ხომ არ იქნებოდა მიზანშეწონილი, გაკეთებულიყო ინვენტარიზაცია და გაგვეფრთხილებინა მიწის მესაკუთრე, მიგვეცა დრო და ობიექტური მიზეზის არ არსებობის შემთხევაში, მიწის გადასახადი გაგვეორმაგებინა, ან მოიძებნოს სხვა მექანიზმი, რომლითაც შემოსავალი დაკომპენსირდება“, – განაცხადა ფრიდონ ინჯიამ.

ევროკავშირში საქართველოს გაწევრიანება უმნიშვნელოვანესია საქართველოს მომავლისთვის, რეგიონში მისი კუთვნილი ადგილის დასაკავებლად.

საპარლამენტო პოლიტიკური ჯგუფის „ევროპელი სოციალისტების“ თავმჯდომარე ფრიდონ ინჯია ევროკავშირში საქართველოს გაწევრიანების საკითხთან დაკავშირებით გამოდის ინიციატივით შეიქმნას დროებითი უწყებათაშორისი სახელმწიფო კომიტეტი პრემიერ-მინისტრის ირაკლი ღარიბაშვილის ხელმძღვანელობით.

როგორც საქართველოს პარლამენტის პლენარულ სხდომაზე ფრიდონ ინჯიამ განაცხადა, ასეთი ტიპის კომისიას უნდა მიეცეს საგანგებო უფლებამოსილება, რომელსაც ქვეყნის საკანონმდებლო ორგანო დაამტკიცებს.

„საქართველოს ისტორიაში მოხდა მნიშვნელოვანი მოვლენა. მივიღეთ კითხვარი, რომლის პასუხების გაცემის შემდეგ ევროკავშირი გამოიტანს შესაბამის დასკვნას, თუ რამდენად შეიძლება მიენიჭოს საქართველოს ევროკავშირში წევრობის კანდიდატის სტატუსი“, – განაცხადა პლენარულ სხდომაზე ფრიდონ ინჯიამ.

„მე წარმოდგენილი მქონდა, რომ ამ საკითხთან დაკავშირებით უნდა შექმნილიყო დროებითი უწყებათაშორისო სახელმწიფო კომიტეტი ან კომისია, რომელსაც, რა თქმა უნდა, სათავეში ჩაუდგებოდა პრემიერ-მინისტრი და მმართველი პარტია. მიმაჩნია, რომ ამ კომისიას უნდა მიეცეს საგანგებო უფლება-მოსილება, რომელსაც დაამტკიცებს პარლამენტი, იმისათვის, რომ ყველა საჭირო ღონისძიება ჩატარებული იყოს მაქსიმალურად მოკლე დროში“, – განაცხადა ფრიდონ ინჯიამ.

მისი თქმით, ევროკავშირში საქართველოს გაწევრიანება უმნიშვნელოვანესია საქართველოს მომავლისთვის, რეგიონში მისი კუთვნილი ადგილის დასაკავებლად.

„მოგვეცა უნიკალური შანსი და ეს უნიკალური შანსი ჩვენ ხელიდან არ უნდა გავუშვათ. ამაში მონაწილეობა უნდა მიიღოს ყველამ, ვისაც რითი შეუძლია, იმისათვის, რომ ეს პროცესი დაჩქარდეს“, – განაცხადა ფრიდონ ინჯიამ.

დეპუტატმა ოპოზიციის ზოგიერთ წარმომადგენელს მიმართა და ქვეყნის აღმშენებლობის პროცესში ჩართვისკენ მოუწოდა.

„მინდა მივმართო ოპოზიციის ზოგიერთ წარმომადგენელს. მათ შორის ბევრია განათლებული, პასუხისმგებლიანი ადამიანი. იმედი მაქვს, ისინი მალე განთავისუფლდებიან გარკვეული ვალდებულებებისგან და შეუერთდებიან იმ ხალხს, რომელთაც მართლაც უნდათ ევროკავშირში გაწევრიანება“, – აღნიშნა ფრიდონ ინჯიამ.