ყოველთვიური არქივები: მარტი2022

საპარლამენტო პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ პარლამენტის რიგგარეშე პლენარულ სხდომაზე საქართველოს პრეზიდენტ სალომე ზურაბიშვილს შეახსენა, რომ ის საქართველოს საგარეო საქმეთა მინისტრი აღარ არის და ქვეყნის საგარეო პოლიტიკას განსაზღვრავს მხოლოდ პარლამენტი და მთავრობა.

პრეზიდენტი სალომე ზურაბიშვილი რიგგარეშე სხდომაზე უმაღლესი საკანონმდებლო ორგანოს წინაშე ყოველწლიური მოხსენებით წარსდგა, სადაც მან უკმაყოფილება გამოთქვა იმის გამო, რომ პარლამენტმა არ გამოთქვა სურვილი, მოესმინა ინფორმაცია მისი შეხვედრების შესახებ ევროპასა და ამერიკის შეერთებულ შტატებში.

„პრეზიდენტმა გამოთქვა უკმაყოფილება, რომ მას ჰქონდა სურვილი, პარლამენტს მოესმინა მისი მოგზაურობების შესახებ, მაგრამ ქალბატონ პრეზიდენტს უნდა შევახსენო, რომ ის იყო საგარეო საქმეთა მინისტრი, მაგრამ დღეს ის არ არის საგარეო საქმეთა მინისტრი, და ქვეყნის საგარეო პოლიტიკას განსაზღვრავს მხოლოდ პარლამენტი და მთავრობა და მას როგორც პრეზიდენტს, ქვეყნის კონსტიტუციიდან გამომდინარე, საგარეო პოლიტიკასთან შეხება არ აქვს“, – განაცხადა ფრიდონ ინჯიამ.

მისი თქმით, თუკი პრეზიდენტი საგარეო ურთიერთობების საკითხებს მაინც განიხილავს საზღვარგარეთ მისი გამოცდილებიდან გამომდინარე, ასეთ შემთხვევაში, ის უნდა შეუთანხმდეს პარლამენტს, მთავრობას, მას ვინც განსაზღვრავს ქვეყნის საგარეო პოლიტიკას.

„ასეთი შეხვედრების დროს დღის წესრიგში დგება გარკვეული საკითხები, რომელიც გადაჭრას მოითხოვს, და ასეთ დროს პრეზიდენტს არ აქვს შესაძლებლობა მიიღოს გადაწყვეტილებები. და ეს კი, ვფიქრობ ზიანს აყენებს ქვეყანას. ამიტომ, თუ ეს იქნება შეთანხმებული შესაბამის ინსტიტუტებთან, რომელსაც ეხება საგარეო პოლიტიკის განსაზღვრა, მაშინ უფრო ქმედითუნარიანი იქნება პრეზიდენტის ევროპაში თუ ამერიკაში მოგზაურობები, სწორედ, მაშინ იქნება სრული თანხვედრა“, – აღნიშნა ფრიდონ ინჯიამ.

🔹 საპარლამენტო პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ უმაღლეს საკანონმდებლო ორგანოში რიგგარეშე პლენარულ სხდომაზე ქვეყნის პრეზიდენტს სალომე ზურაბიშვილს მიმართა, რომელიც პარლამეტის წინაშე ყოველწლიური მოხსენებით წარსდგა.
🔹 ფრიდონ ინჯიამ რიგგარეშე სხდომაზე იმედი გამოთქვა, რომ სალომე ზურაბიშვილი შეძლებს გაუძლოს ზეწოლას, რომელსაც იგი სხვადასხვა ასპექტში განიცდის.
🔹 „მე მინდა ჩვენი პრეზიდენტის ყურადღება მივიქციო ასეთ საკითხზე. კერძოდ, საქართველოს ბოლო პრეზიდენტები მათი პრეზიდენტად მოსვლის პირველ პერიოდში იყვნენ განსხვავებულ პოზიციებზე, განსხვავებული ხედვა ჰქონდათ. პრეზიდენტობის მეორე ნახევარში კი, მათი შეხედულებები იცვლებოდა. თუმცა, ეს მარტო პრეზიდენტებს არ ეხებათ. დღეს ძალიან ბევრი პოლიტიკოსია, რომელიც გარკვეული პერიოდის წინ 180 გრადუსით სხვა პოზიციაზე იყო და დღეს კი სულ სხვა ბანაკშია.
🔹 მე იმედი მაქვს, რომ ჩვენს პრეზიდენტს შესწევს ძალა გაუძლოს ზეწოლას. ზეწოლა შეიძლება იყოს სხვადასხვა სახის, სხვადასხვა ასპექტში. ეხლა არ მინდა შევიდე კონკრეტიკაში, თუ რა ზეწოლა მაქვს მხედველობაში“, – აღნიშნა ფრიდონ ინჯიამ.

📍 საპარლამენტო პოლიტიკური ჯგუფის „ევროპელი სოციალისტების“ თავმჯდომარის ფრიდონ ინჯიას აზრით, დაუშვებელია, რომ ქვეყნის უშიშროების საბჭოს სხდომაში მონაწილეობდნენ ისეთი პარტიის წარმომადგენლები, რომლებიც საკუთარ პარტიულ ინტერესებს ქვეყნის ინტერესებზე მაღლა აყენებენ.
🔹 ამის შესახებ ფრიდონ ინჯიამ პარლამენტის რიგგარეშე პლენარულ სხდომაზე განაცხადა, სადაც ქვეყნის პრეზიდენტმა სალომე ზურაბიშვილმა პარლამენტს ყოველწლიური მოხსენებით მიმართა.
🔹 თავის გამოსვლაში ზურაბიშვილმა ყურადღება გაამახვილა უშიშროების საბჭოს სხდომის მოწვევის აუცილებლობაზე, რომელიც დღემდე არ ჩატარებულა, მიუხედავად ქვეყანაში და ზოგადად მსოფლიოში არსებული მძიმე პოლიტიკური ვითარებისა.
🔹 „პრეზიდენტმა თავის გამოსვლაში ისაუბრა გაფართოებული უშიშროების საბჭოს სხდომის ჩატარების შესახებ, რომელშიც, მისი აზრით, სხვადასხვა პარტიამ უნდა მიიღოს მონაწილეობა. 🔹 მე არ მიმაჩნია მიზანშეწონილად უშიშროების საბჭოს სხდომაში იღებდნენ მონაწილეობას ისეთი პარტიების წარმომადგენლები, რომლებიც თავიანთ პარტიულ ინტერესებს ქვეყნის ინტერესებზე მაღლა აყენებენ“, – განაცხადა ფრიდონ ინჯიამ.
🔹 მისი აზრით, უშიშროების საბჭოს სხდომას უნდა ატარებდეს პარლამენტი, მთავრობა და პრეზიდენტი, სადაც მიღებული იქნება ქვეყნისთვის სასიცოცხლო მნიშვნელობის გადაწყვეტილებები.

🔹 საპარლამენტო პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ პარლამენტის რიგგარეშე პლენარულ სხდომაზე პრეზიდენტ სალომე ზურაბიშვილის ყოველწლიური გამოსვლის დროს ყურადღება გაამახვილა საქართველოს მოქალაქეობის მინიჭების საკითხზე, საქართველოდან იძულებით გადაადგილებულ პირთათვის.
🔹 „ქვეყნის ინტერესებიდან გამომდინარე, მე მაღელვებს ერთი საკითხი. ჩვენ ვეხმარებით ყველას ვინც ჩვენთან ჩამოდის, განსაკუთრებით უკრაინიდან ლტოლვილ ხალხს, მეც ვიღებ ამაში მონაწილეობას და ვაკეთებთ ყველაფერს. ყველაფერი სალაპარაკო არ არის… ამასთანავე, უნდა აღინიშნოს, რომ ლტოლვილები, რომლებიც ბრუნდებიან უკან, საქართველოში აწყდებიან იურიდიულ-სამართლებრივ სირთულეებს. ბევრს სურს, რომ დაიბრუნოს მოქალაქეობა და ვერ იბრუნებს. დაიბადა აფხაზეთში, მოუწია წასვლა აფხაზეთიდან, დედა, მამა და ყველა საქართველოს მოქალაქეა, მაგრამ იმის გამო, რომ შვილმა არ იცის ქართული ან, ცუდად ფლობს ქართულ ენას, ის ვერ ბრუნდება საქართველოში და ვერ იღებს საქართველოს მოქალაქეობას“, – განაცხადა ფრიდონ ინჯიამ. 🔹 მისი თქმით, „ევროპელ სოციალისტებს“ ამ თემასთან დაკავშირებით ჰქონდათ შეხება პრეზიდენტის აპარატთან და მისასალმებელია, რომ გარკვეული ხედვები ამ საკითხთან მიმართებაში ერთმანეთს დაემთხვა.
🔹 „ჩემი აზრით, მათთვის ხელის არშეწყობა დანაშაულს უდრის. ჩვენ ფეხზე უნდა დავდგეთ და ეს ურთულესი მდგომარეობა გამოვიყენოთ ჩვენი ქვეყნის გამაგრებისთვის, გაძლიერებისთვის. აი, ეს არის მნიშვნელოვანი“, – განაცხადა ფრიდონ ინჯიამ.