ყოველთვიური არქივები: დეკემბერი2022

📍 სლოგანები: „მშვიდობის ქალაქი“ და „მშვიდობის ქვეყანა“ შეიძლება არ მოსწონდეთ მხოლოდ მათ, ვისაც დესტაბილიზაციის გზით ხელისუფლების ხელში ჩაგდება უნდათ – ფრიდონ ინჯია

🔹 „ვისაც უნდა ხელისუფლების შეცვლა საქართველოში და არ შეუძლია ამის არჩევნების გზით განხორციელება, რჩება ერთადერთი გზა – დესტაბილიზაცია. დესტაბილიზაცია შესაძლებელია მაშინ, როდესაც ხდება კატაკლიზმები, და შენ ომის მხარედ გამოდიხარ“.

🔹 ამის შესახებ საპარლამენტო პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ ტელეკომპანია „ალტ-ინფოს“ პირდაპირ ეთერში განაცხადა.

🔹 დეპუტატის თქმით, რადიკალური ოპოზიციის ნაწილისგან განსხვავებით, ის რუსეთის კვალს ვერ ხედავს სლოგანებში „მშვიდობის ქალაქი“ ან „მშვიდობის ქვეყანა“, რადგან რუსეთი აწარმოებს ომს უკრაინაში, და ის მშვიდობის ქვეყანა, ამ შემთხვევაში, არ არის. ამასთანავე, თუ საქართველოში მშვიდობა არ იქნება, არც ის ეკონომიკური ზრდა იქნება, რომელიც ბევრი სხვა სახელმწიფოსთვის მიმზიდველია დღეს.

🔹 „თქვენ წარმოიდგინეთ, რუსის ჯარი დგას, ზოგიერთ ადგილას, 150 მეტრში ცენტრალური მაგისტრალიდან, და იქ სამხედრო ხელმძღვანელობიდან ვიღაცას თავში რომ მოუვიდეს და გადმოიწიოს 150 მეტრით, საქართველო აღმოჩნდება ორად გაყოფილი… აღმოსავლეთ საქართველო კიდევ შეიძლება გაიყოს, დასავლეთ საქართველო ისედაც გაყოფილია. სწორედ ეს იქნება ის დესტაბილიზაცია, რომელიც ხელს შეუწყობს დაინტერესებულ პირებს ხელში ჩაიგდონ ქვეყანა. ამიტომ ეს სლოგანი და ის მშვიდობა, რომელიც არის საქართველოში, მიმზიდველია ყველა ქვეყნისთვის ჩვენს სამეზობლოში. კავკასიის რეგიონში არის სახელმწიფო, სადაც 2008 წლის შემდეგ ომი არ ყოფილა. დღეს საქართველოში ყველაზე დასაფასებელია სიმშვიდე – ქალაქში გადიხარ და შიში არ გაქვს, რომ განგაშის სირენა ჩაირთვება, და სადღაც თავშესაფარი უნდა ეძებო, ან შუქი და წყალი არ გექნება, ვერ წახვალ, სადაც გინდა… ეს არის მდგომარეობა, რომელზეც ბევრი ქვეყანა დღეს ოცნებობს“, – აღნიშნა ფრიდონ ინჯიამ.

👉 პატიმარ სააკაშვილის ჯანმრთელობაში, პირველ რიგში, ხელისუფლებაა დაინტერესებული – ფრიდონ ინჯია

🔹 „თუ ვინმეს უნდა ჯანმრთელად ჰყავდეს პატიმარი სააკაშვილი, პირველ რიგში, ეს არის ხელისუფლება. მე ვფიქრობ, ხელისუფლება ყველანაირად დაინტერესებულია იმაში, რომ ის იყოს ჯანსაღად იქ, სადაც არის. რა თქმა უნდა, ყველა პატიმარი უნდა იყოს დაცული, და სახელმწიფო პასუხისმგებელია მათ ჯანმრთელობაზე… რამე რომ მოუვიდეს პატიმარ სააკაშვილს, და ამაში დამნაშავე იყოს სახელმწიფო, ეს იქნება დიდი პრობლემა ხელისუფლებისთვის და უარყოფითი იმიჯი – მთლიანად ქვეყნისთვის“, – განაცხადა საპარლამენტო პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ ტელეკომპანია “ალტ-ინფოს” პირდაპირ ეთერში.

🔹 დეპუტატმა ხაზგასმით აღნიშნა, რომ თუ სახელმწიფო ვერ უმკლავდება პატიმრის მკურნალობას, ამ შემთხვევაში თავად სახელმწიფომ უნდა მიმართოს დახმარებისთვის სხვა ქვეყანას, იმ მიზნით, რომ ჩამოიტანონ ან აპარატურა, ან მედიკამენტები და ყველაფერი, რაც საჭიროა პატიმრის სამკურნალოდ.

🔹 „რა თქმა უნდა, დედა და მამა იტყვიან, წაიყვანეთ უცხოეთში, მაგრამ აქ სასამართლომ უნდა აჩვენოს თავისი დამოკიდებულება, რადგან საქართველოსთვის ეს უპრეცედენტო საქმეა, და რა გადაწყვეტილებასაც გამოიტანს, ის უნდა იყოს ძალიან არგუმენტირებული, რადგან ის ხანგრძლივი მსჯელობის საგანი გახდება“, – აღნიშნა დეპუტატმა.

🔹რაც შეეხება მიხეილ სააკაშვილის გეგმებს საქართველოში დაბრუნების დროს, ფრიდონ ინჯიამ განაცხადა, რომ ციხეში ყოფნა მის გეგმებში ნამდვილად არ შედიოდა.

🔹„დაკავება მის გეგმებში არ იყო, შესაძლოა, სხვების გეგმაში იყო, მაგრამ მე დარწმუნებული ვარ 100%-ით, რომ დაკავება მას აზრად არ ჰქონდა. მან იცოდა, რომ მას ვერ კი არა, არ დააკავებდნენ. ალბათ ფიქრობდა, რომ ამისთვის საზოგადოების აზრი მომზადებული იყო, და მას ელოდნენ. გეგმის გარეშე, მისი ჩამოსვლა გამორიცხული იყო, თუმცა რა იყო მისი გეგმა, ეს აუცილებლად გამოჩნდება“, – განაცხადა დეპუტატმა.