Category Archives: მთავარი

„ევროპელმა სოციალისტებმა“  ეუთო-ODIHR -ისა და ვენეციის კომისიის დელეგაციასთან საარჩევნო კოდექსში შესატანი ცვლილებების პროექტზე ისაუბრეს

ელექტრონულ საარჩევნო სისტემაზე გადასვლისა და ადმინისტრაციული რესურსის უკანონო გამოყენების აღმოფხვრის მნიშვნელობაზე ისაუბრეს პოლიტიკური ჯგუფის „ევროპელი სოციალისტების“ დეპუტაციამ  ეუთო-ODIHR -ისა და ვენეციის კომისიის დელეგაციასთან შეხვედრისას პარლამენტში.

ეუთო-ს დემოკრატიული ინსტიტუტებისა და ადამიანის უფლებათა ოფისის  და ვენეციის კომისიის ერთობლივი დელეგაციის წევრები დაინტერესდნენ საარჩევნო კოდექსში შესატანი ცვლილებების პროექტით, რომელსაც პარლამენტმა პირველი მოსმენით კენჭი უკვე უყარა.

როგორც „ევროპელი სოციალისტების“ თავმჯდომარემ ფრიდონ ინჯიამ შეხვედრაზე განაცხადა, ყველაზე მნიშვნელოვანი ცვლილება არის ხმის მიცემისა და დათვლის პროცესის ელექტრონული მეთოდით განხორციელება.

ამასთანავე, დეპუტატის თქმით, უმნიშვნელოვანესია ადმინისტრაციული რესურსის გამოყენების საკითხის აღმოფხვრა, თუმცა ამ მიმართულებით ჯარიმის გაორმაგება არაეფექტური იქნება.  

„არჩევნების წინა პერიოდში ადმინისტრაციული რესურსის გამოყენების  აღმოსაფხვრელად ჯარიმების გაორმაგება მე არ მიმაჩია ქმედითად. საჭიროა მკაცრი ადმინისტრაციული ზემოქმედება. პირს, რომელიც უკანონო ქმედების ჩადენას შეეცდება, აღარ უნდა ჰქონდეს სახელმწიფო სამსახურში მუშაობის უფლება და სასჯელი ციხეში უნდა მოიხადოს. ხოლო ჯარიმის გაორმაგების შემთხვევაში, ამ ჯარიმას გადაიხდის დამკვეთი და არა შემსრულებელი“, – განაცხადა ფრიდონ ინჯიამ.

მისი თქმით, ასევე გამოსასწორებელია ცესკო-ს თავმჯდომარის არჩევის წესი, რომელიც ამჟამად საჭირო 90 ხმის არარსებობის გამო, 6 თვის ვადით ირჩევა.  

„ეს არანორმალურია – მთავრობას ვირჩევთ 76 ხმით, ხოლო ცესკო-ს თავმჯდომარეს – 90 ხმით. ეს არის მმართველი პარტიის უკან დახევა და მისი არათანმიმდევრული ქმედება“, – აღნიშნა ფრიდონ ინჯიამ.  

როგორც პოლიტიკური ჯგუფის „ევროპელი სოციალისტების“ წევრმა  დავით ზილფიმიანმა  განაცხადა,  არჩევნებთან დაკავშირებით ყველა პრობლემას მოხსნის ელექტრონული არჩევნები, თუ კი მასში გათვალისწინებული იქნება არა მხოლოდ ელექტრონული ხმის მიცემის პროცესი, არამედ ამომრჩევლის  ელექტრონული მეთოდით იდენტიფიკაციაც, ე.წ. ვიდეო-იმიჯის სახით. 

„ამჟამინდელ ცვლილებებთან დაკავშირებით ნაკლებად კრიტიკული ვარ და ძირითადი აქცენტი გადამაქვს 5%-იან სარჩევნო ბარიერზე, რომელიც დღემდე უცვლელი რჩება. ბარიერის დაახლოებით 2,5%-მდე შემცირების მომხრე ვარ, რაც მცირე პარტიებს გასვლის შანს მისცემს, ხოლო ბარიერგადალახულ სუბიექტებს – საკუთარი ჯგუფის ან ფრაქციის ჩამოყალიბების საშუალებას“, – განაცხადა დავით ზილფიმიანმა.  

👉 ფრიდონ ინჯია გამოდის ინიციატივით 500-ლარიანი დახმარების გაცემის თაობაზე სოფლად მყოფი იმ ოჯახებისთვის, რომლებსაც 2023 წელს შვილი შეეძინებათ

🔹 ვისთვის ხორციელდება მსხვილი ინფრასტრუქტურული პროექტები, მაშინ როცა საქართველოს სოფლები დაცლილია, ხოლო საქართველოს 1 მილიონამდე მოქალაქე, მათ შორის სტუდენტები და შრომისუნარიანი მოსახლეობა საზღვარგარეთ არის გადახვეწილი.

🔹 ამის შესახებ პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ პარლამენტის პლენარულ სხდომაზე განაცხადა და გამოთქვა ინიციატივა 500-ლარიანი დახმარების გაცემის თაობაზე სოფლად მყოფი იმ ოჯახებისთვის, რომლებსაც 2023 წელს შვილი შეეძინებათ.

🔹 „მთელი მასმედია და დღეს პარლამენტიც საუბრობს, როგორც მე ვფიქრობ, მეორეხარისხოვან საკითხებზე: თავსმოხვეულ კანდიდატობის სტატუსზე, 12-პუნქტიან მოთხოვნებზე; ვინ იქნება სახალხო დამცველი და როგორ შევთანხმდეთ სახალხო დამცველის კანდიდატურაზე, თუ ვერ შევთანხმდით, ეს უკვე შემდეგი სასაუბრო თემა იქნება; ვინ იქნება „ნაციონალური მოძრაობის“ თავმჯდომარე; ვსაუბრობთ ომზე იმ დიდ ქვეყნებს შორის, რომელიც ევროპასა და მთელს მსოფლიოშია გაჩაღებული; ვსაუბრობთ დეოლიგარქიზაციაზე და გვინდა ერთი მეცენატი პიროვნება როგორმე გავაქციოთ ქვეყნიდან, ნაცვლად იმისა, რომ მოვიზიდოთ შეძლებული ადამიანები. ამ დროს რას წარმოადგენს საქართველო დღეს? დაახლოებით 3 700 000 მოსახლეობაა, აქედან 1 მილიონამდე ადამიანი, მათ შორის სტუდენტები და სამუშაოს მაძიებლები გადახვეწილი არიან სამშობლოდან, და კაცმა არ იცის, დაბრუნდებიან თუ არა. 2021 წლის მონაცემებით, გარდაცვალება 15 000-ით აღემატება შობადობას – გარდაიცვალა 60 000 ადამიანი“, – განაცხადა ფრიდონ ინჯიამ.

🔹 როგორც დეპუტატმა აღნიშნა, საქართველოს სოფლები დაცლილია ახალგაზრდებისგან, შრომისუნარიანი მოსახლეობისგან, მაშინ როცა აქ ხორციელდება მსხვილი ინფრასტრუქტურული პროექტები.

🔹 „ვაშენებთ ინფრასტრუქტურას, გაგვყავს გზები, გაზი, ელექ ტროენერგია, წყალი… ვისთვის ვაკეთებთ ამას, თუ ჩვენ მოსახლეობა არ გვეყოლება? მე მიმაჩნია, დღეს ყველაზე მთავარი არის მოსახლეობის სოფლად დამაგრება, შობადობის გაზრდა და ხელშეწყობა, ასევე მოქალაქეების საქართველოში დაბრუნება. სხვაგვარად ეს ქვეყანა უმძიმეს მდგომარეობაში აღმოჩნდება ხვალ“, – აღნიშნა ფრიდონ ინჯიამ.

🔹 მისი თქმით, სოფლად ერთი ბავშვის გაზრდაზე ოჯახს დაახლოებით 500 ლარი სჭირდება.

🔹 „გავაკეთოთ ისე, რომ 2023 წელი იყოს შობადობის გაზრდის წელიწადი, დავეხმაროთ 500 ლარით იმ ოჯახებს, სადაც 2023 წელს ბავშვი დაიბადება“, – აღნიშნა ფრიდონ ინჯიამ.

ჩინეთის სახალხო რესპუბლიკის თავჯდომარეს,

ჩინეთის კომუნისტური პარტიის გენერალურ მდივანს,

ბატონ,  სი ძინპინს

პატივცემულო, ამხანაგო სი ძინპინ!

საქართველოს „ევროპელი სოციალისტების“ სახელით გილოცავთ სრულიად ჩინეთის კომუნისტური პარტიის მე-20 ყრილობის დიდი წარმატებით დამთავრებას და მივესალმებით კვლავ თქვენს არჩევას ჩინეთის კომუნისტური პარტიის ცენტრალური კომიტეტის გენერალური მდივნის თანამდებობაზე.

ჩინეთის კომუნისტური პარტიის საიუბილეო მე-20 ყრილობა გახდა ერთ-ერთი ყველაზე მნიშვნელოვანი მოვლენა თანამედროვე მსოფლიო პოლიტიკურ ცხოვრებაში.

ჩინეთის კომუნისტური პარტიის ყრილობამ ჩინელ ხალხსა და მთელ მსოფლიოს შეატყობინა გასული ათწლეულის განმავლობაში ჩინეთის კომუნისტური პარტიის მიერ წარმატებით განხორციელებული რეფორმების შესახებ, როგორც ეკონომიკური განვითარების, ასევე სოციალიზმის მოდერნიზაციის და ახალი დიდი პარტიული მშენებლობის პროგრამის განხორციელების საქმეში.

ყრილობის შედეგებში მკაფიოდ გამოჩნდა, თუ რა კურსი იქნა მიღებული მომავალ ხუთწლედში ჩინეთის სახალხო რესპუბლიკის განვითარების თანამედროვე არქიტექტურიკის შესაქმნელად, მოდერნიზირებული სოციალისტური, ჩინურ სპეციფიკაზე დაყრდნობილი, სახელმწიფო სისტემის ასაშენებლად.

მჯერა, რომ თქვენს სიტყვაში გაჟღერებული, ჩინეთის მომავალი განვითარების თეზისები: „სოციალისტურ საბაზრო ეკონომიკის უმაღლესი სისტემის ფორმირება“, „თანამედროვე წარმოების სისტემის ფორმირება“, „სოფლის ყოველმხრივი სტიმულირების პროგრამა“, „რეგიონების კოორდინირებული განვითარების ხელშეწყობა“, „გარე სამყაროსთან მაქსიმალური გახსნილობა“, მიიყვანს ჩინეთის სახალხო რესპუბლიკას ახალი სისტემის – „უფრო მოდერნიზირებული სოციალიზმი ჩინური სპეციფიკით“ ჩამოყალიბებამდე.

ქართველი სოციალისტები უსურვებენ თავიანთ ჩინელ თანამოაზრეებს და მეგობრებს კეთილდღეობას და მათი ყველა გეგმის განხორციელებას.

დარწმუნებული ვართ, რომ საქართველოს და ჩინეთის მეგობრობა სრულად აკმაყოფილებს ჩვენი ხალხების ღრმა ინტერესებს.

ჩვენი პარტია „ევროპელი სოციალისტები“ მომავალშიც არ დავიშურებთ ძალისხმევას ამ ურთიერთობების გასაძლიერებლად.

ძვირფასო სი ძინპინ, გისურვებთ ჯანმრთელობას, დღეგრძელობას და ახალ წარმატებებს თქვენს რთულ, ამავდროულად კეთილშობილურ საქმიანობაში!

პატივისცემით,

პარტია „ევროპელი სოციალისტების“ და პოლიტსაბჭოს

თავმჯდომარე  ფრიდონ ინჯია

„კანონის პროექტი დეოლიგარქიზაციის შესახებ ანტიკონსტიტუციურია“.

ამის შესახებ საპარალამენტო პოლიტიკური ჯგუფის „ევროპელი სოციალისტების“ თავმჯდომარემ ფრიდონ ინჯიამ ტელეკომპანია „ალტ-ინფოს“ გადაცემაში „ალტერნატიული ხედვა“ განაცხადა.

„ჩვენ ბოლომდე ვიქნებით ამ კანონპროექტის წინააღმდეგი, რადგან იგი ეწინააღმდეგება საქართველოს კონსტიტუციას. ე.წ. რეესტრში პიროვნების შეყვანა, მისი გამოცხადება ოლიგარქად ისე, რომ მას გასაჩივრების უფლება არ ჰქონდეს, ეს საქართველოს კონსტიტუციის 31-ე მუხლს ეწინააღმდეგება. მოქალაქეს უნდა ჰქონდეს ნებისმიერი გადაწყვეტილების გასაჩივრების უფლება. თუ პარლამენტი ამ სახით მიიღებს კანონპროექტს „დეოლიგაქიზაციის შესახებ“, ჩვენ საკონსტიტუციო სასამართლოში შევიტანთ კონსტიტუციურ სარჩელს“, – განაცხადა ფრიდონ ინჯიამ.

დეპუტატის თქმით, მმართველმა პარტიამ, ძალიან ოსტატურად გამოიყენა უკრაინის კანონი და ერთი ერთზე გადმოიტანა იგი საქართველოში.

„თუკი, კანონი მისაღებია უკრაინაში, ლოგიკით, აქაც მისაღები უნდა იყოს იგი. თუკი ოლიგარქის ცნება უკრაინაში არსებული რეალობის პარამეტრებში ჯდება, მაშინ, აქაც უნდა ჩაჯდეს და ასეთ შემთხვევაში, ამ სიაში შეიძლება მოხვდეს ბევრი ადამიანია, მათ შორის ოპოზიციიდან. ამიტომ, მმართველი პარტია, აქ ცდილობს ორი კურდღლის დაჭერას. ამასთან, მნიშვნელოვანია ეუთო/ოდირის დასკვნა აღნიშნულ კანონპროექტთან დაკავშირებით, რომელსაც მმართველი პარტია ელოდება“, – აღნიშნა დეპუტატმა.

პოლიტიკური ჯგუფის თავმჯდომარეს მიაჩნია, რომ ხელისუფლებამ მეტი ყურადღება უნდა დაუთმოს და გააგრძელოს მუშაობა ქვეყნის ეკონომიკური განვითარებისა და გაძლიერების მიმართულებით და ასევე, სამშვიდობო პოლიტიკის კუთხით, რომლის შედეგების მომსწრე ვართ ჩვენ დღეს.

„სწორედ ქვეყნის ინტერსები და სახელმწიფოებრივი აზროვნებაა მნიშვნელოვანი, ვიდრე 12-პუნქტიანი გეგმის შესრულება, რისთვისაც ასე იღწვის დღევანდელი ხელისუფლება. მნიშვნელოვანია ხისტი პოლიტიკის გატარება, რაშიც, სამწუხაროდ, მოიკოჭლებს ჩვენი მთავრობა“, – დასძინა ფრიდონ ინჯიამ.

ევროპარლამენტის მიერ გამოქვეყნებულ ბოლო დოკუმენტს, რომელშიც ჩადებულია მოწოდება საქართველოს ხელისუფლებისადმი მიხეილ სააკაშვილის პატიმრობიდან გათავისუფლების თაობაზე, საპარლამენტო პოლიტიკური ჯგუფის “ევროპელი სოციალისტების” თავმჯდომარე ფრიდონ ინჯია სახელმწიფო საქმეებში უხეშ ჩარევად აფასებს.

“ეს არის ცალსახად საქართველოს შიდა საქმეებში ჩარევა. ეს არის შეურაცხყოფა სახელმწიფოსი, კონსტიტუციის, იმ კანონების, რომელიც ავლენს დამნაშავეს. პრაქტიკულად, გვეუბნებიან, გაათავისუფლე დამნაშავეო. დამნაშავე არის დამნაშავე, არა მხოლოდ საქართველოს კანონმდებლობით, არამედ, მათი კანონმდებლობითაც. დამნაშავე უნდა დაისაჯოს, მიუხედავად მისი პოლიტიკური ხედვისა თუ სტატუსისა“, – განაცხადა დეპუტატმა ტელეკომპანია „ალტ-ინფოს“ გადაცემაში „ალტერნატიული ხედვა“.

დოკუმენტის თანახმად, ევროპარლამენტი კიდევ ერთხელ მოუწოდებს საქართველოს ხელისუფლებას, გაათავისუფლოს ყოფილი პრეზიდენტი მიხეილ სააკაშვილი და მისცეს მას უფლება, გაიაროს სათანადო მკურნალობა საზღვარგარეთ ჰუმანიტარული მიზნით და გამოიყენოს ეს როგორც პოლიტიკური პოლარიზაციის შემცირების საშუალება.

რაც შეეხება ბადრი ჯაფარიძისა და მამუკა ხაზარაძის საქმეს, პოლიტიკური ჯგუფის თავმჯდომარემ აღნიშნა, რომ თუ მათ რაიმე დანაშაული ჰქონდათ, შესაბამის უწყებებს ცოტა ადრე უნდა მიეღოთ გადაწყვეტილება მათთან მიმართებაში, სანამ ჯაფარიძე – ხაზარაძე პოლიტიკაში ჩაერთვებოდნენ.

„ამისთვის იყო მთელი 7-8 წელი და მეტიც კი. ამიტომ, აქ ცოტა სხვანაირად არის საქმე. მიუხედავად ამისა, ესეც საქართველოს ხელისუფლების საქმეა“, – დასძინა დეპუტატმა.